Tiga Parti BN Pampang Opar Mantah Sitak Nya Diambi PBB

KUCHING: Kaban SUPP, SPDP enggau PRS pampang Opar mujur ngumpul lebih 1,200 iti sain jari ari penyukung ti enda setuju enggau pengeran Kaban Kunsil Nengeri (ADUN) Opar Ranum Mina nyereta PBB ti tau ngujungka sitak nya diempu parti pemadu besai dalam serakup BN.

Nengah seiti penerang ke dipansut SUPP, kimpin ngulihka sain jari nya dipungkal ketetiga parti dalam serakup BN ba bulan ke udah.

Ketetiga chairman pampang iya nya Ampel Barba (SUPP), Rayan Narong (SPDP) enggau Arkin Raper (PRS) bela nyaup ngemujur kimpin.

Seiku pengari SUPP mega madah seiti deklarasyen udah digaga bala penyukung ke alai sida enda setuju Ranum mai sitak Opar ke diempu SUPP begulai enggau PBB.

“Ranum bisi hak nyereta PBB tang iya enda dikemendar mai sitak Opar,’ku pengari SUPP nya.

Sain jari nya disua ngagai presiden SUPP Datuk Dr Sim Kui Hian di Indu Opis SUPP ditu kemari lalu bela dikemata mandal presiden iya Datuk Francis Harden Hollis.-UB