Ubah Ulah Diri Dikena Nyapai Juluk Pemansang

SIBU: Raban bansa Dayak megai tanggungpengawa ke besai bela ngemujurka juluk ati nengeri tu ti deka nyadi nengeri mansang manggai taun 2030.

Kaban Kunsil Nengeri (ADUN) Tamin Christopher Gira Sambang madah, singkang keterubah dikena nyapai juluk tu iya nya ngubah ulah diri.

“Dikena ngemujurka juluk nya, nengeri kitai bisi ngubah sistem megai nengeri tu nyengkaum ngubah atur ba sistem ngambi orang gawa perintah enggau kompeni setengah perintah.

“Sistem tu nentuka orang ke diambi gawa endang orang ti sigi bisi pengelandik sereta bepenau ngambika sida endang orang ti ulih megai bejalaika pengawa enggau manah.

“Nya alai, kitai Dayak meseti beratika pekara tu ngambika kitai enda tinggal ari orang bukai lalu sama bela mansang maya taun 2030 ila,” pia ku iya madah.

Iya mantaika jaku tu maya ngulu Rami Beserumpu Gawai Ngiling Bidai ke diatur Gabungan Guru Dayak Daerah Sibu ba sebengkah hotel ditu, malam kilah ensana.

Nambahka nya, ku Gira, perintah nengeri tu mega diatu benung chakah matak orang menua luar beranakka puku ba projek besai baka Projek Kuasa Tau Dikena Baru Sarawak (SCORE).

“Enti orang beranakka puku tu mayuh dia perintah nengeri kitai deka mayuh agi bulih asil lalu asil tu nentuka menua kitai mansang,” ku iya madahka baru.

Bepun ari nya, raban bansa Dayak ku iya, meseti beratika semua pekara tu enggau silik sereta ngembuan runding deka berubah berengkah ari diatu.

Kelimpah ari nya, Gira ngarapka serakup bala pengajar nya bela ngasaika juluk ati nengeri tu sebengkah ari tanggungpengawa sida ke besai.

Ku iya, serakup tu meseti bebendar ngajar nembiak lebih agi di menua pesisir ngambika sida ngembuan pelajar ti chukup enggau orang ngemansangka menua tu.

“Ukai semina nya, serakup kita tau begempung enggau serakup tauka gerempung Dayak ke bukai ngambika kita bela ngemansangka raban bansa Dayak,” pia ku iya madah.

Ba pekara politik, Gira madahka iya andal amat sida ti ngenggaika Barisan Nasional (BN) maya Pengawa Bepilih Nengeri (PRN) tu tadi ulih mulaika diri ngagai BN baru.

“Aku terus terang madah ngagai kita (penyakal) aku enda ringat ngagai kita ke enda nyukung aku suba.

“Tang aku ngarapka kita ulih begulai baru enggau kami dalam BN,” ku iya sambil beterima kasih ngagai bala pengundi di DUN Tamin ti udah milih iya nyadi pengari rayat dia.

Ba pengerami nya, Gira bisi meri serakup nya geran RM5,000 dikena sida bejalaika program.-UB