Kompeni, pengaji dilalau ngerejista diri ba PERKESO

KUCHING: Kompeni enggau pengaji diberi timpuh ari 1 Mac nyentuk 31 Mac ngerijista diri nyadi pemayar ngagai Pertubuhan Keselamatan Sosial (PERKESO), nengah program ‘Tempoh Pemutihan’ sebedau sebarang atur kuasa diambi ba sida tu.

Direktor PERKESO Nengeri Sarawak, Phillip Sangkan madahka ‘Tempoh Pemutihan’ digaga berengkah ari sehari tu (1 Mac) nyentuk 31 Mac, meri peluang ngagai kompeni enggau pengaji ke bedau ngerijista diri enggau PERKESO, ngambika sida ulih ngerijista nama pekereja sida ti masuk skim nya ba barang bagi10 buah opis PERKESO di serata Sarawak.

“Kami (PERKESO) ngelalau pengaji tauka kompeni datai ngagai opis PERKESO lalu ngerijista nama pekereja sida dalam timpuh tu ba barang bagi 10 buah opis di serata Sarawak.

“Dalam ‘Tempoh Pemutihan’ tu, kami ngelunggarka atur ngagai kompeni tauka pengaji ngerejista ngambika sida enda diukum tauka kompaun enti sida ngaga nya dalam timpuh tu,” ku Phillip madah lebuh bejaku ba aum media ti diatur di Indu Opis PERKESO ditu, kemari.

Nitihka rikod ku iya, di serata Sarawak, bisi urung 36,957 kompeni tauka orang pengaji ti udah berejista enggau PERKESO ke nyaga pengelikun ba urung 468,922 pengereja pengawa di serata menua Sarawak.

“Taja pia, aku pechaya agi mayuh kompeni tauka pengaji di luar din,bedau mayar tauka ngerijista nama pekereja sida ari baruh skim ti bisi disediaka nengah Akta Keselamatan Sosial.

“Kami ngarapka kompeni tauka pengaji ngambi peluang ngena ‘Tempoh Pemutihan’ tu ke diberi ngagai semua kompeni tauka pengaji ngerejista sida empu,” ku iya.

Kelimpah ari nya, kena 1 Jun 2016 taun siti nyin tadi, PERKESO neritaka atur enda tau enda ngagai semua pengereja pengawa ngerijista diri ba PERKESO….Semua pengereja pengawa enda ngira batang gaji sida.

“Sekeda ari kebuah kompeni tauka pengaji enda mayar laban sida enda nemu pasal atur PERKESO tu, taja pan kami udah suah endar meri penemu pasal pekara tu ngagai komuniti, lalu sekeda engka enda ibuhka pekara tu,” ku iya.

Sebedau atur tu diteritka, PERKESO semina betatika pengereja pengawa ke begaji RM3,000 ke baruh tang udah 1 Jun 2016, semua atur nya enda tau enda lalu mungkur tetiap renggat mensia mayuh ke gawa.

“Jangka aku, agi mayuh pengereja pengawa di luar din ke disengkaum dalam (braket tu) ke nerima RM3,000 ke atas, bedau ngerijista diri empu enggau kami.

“Kena awak ‘Tempoh Pemutihan’ tu ngambika nadai sebarang atur di ambi ba kompeni tauka orang ke ngaji orang bukai gawa berengkah ari 1 April tu ila (Ops Kesan). Laban Seksyen 4, baruh ‘Akta Keselamatan Sosial’ meri atur ke enda tau enda ngerijista sida empu (kompeni tauka orang ke ngaji orang bukai gawa) lalu Seksyen 5, baruh genteran tusun ukum tu neritka atur semua pengereja pengawa ngerijista diri ba PERKESO,” ku iya.

Taja pia, enti udah ngelui 1 April 2017 kompeni tauka pengaji orang tauka pengereja pengawa mengkang enda ibuh ke atur tu, sida tu ke tau dichaj kompaun antara RM500 nyentuk RM4,000 (nitihka bansa penyalah).

“Lalu enti majak enda ibuh, enda mayar kompaun, atur ke terit agi baka dipechara ba kort ke ulih ngukum orang tauka kompeni nya manggai ba RM10,000 tauka dijil nyentuk dua taun…..Reti nya, penyalah nya udah balat endar,” ku iya.

Nitihka statistik, rikod PERKESO Sarawak 2016 mandangka PERKESO Sarawak udah ngeluarka 268 iti kompaun di serata Sarawak, ke mungkur penyampau kompaun RM153,500 udah digumpul ketegal mayuh macham penyalah ari baruh Seksyen 4 & 5, lalu di Kuching aja ke taun 2016, 85 kompaun bisi dikeluarka enggau penyampau kompaun ke digumpul RM55,000.

Kelimpah ari nya mega, PERKESO bejalaika dua bansa skim, ‘Skim Bencana Perkerjaan (SBP) enggau Skim Eilat’, lalu nitihka rikod semanjai taun 2016, udah ngerikod urung 3,363 kes ke bisi diripot di serata Sarawak, ke mungkur penyampau ke udah dibayar ngagai pengereja pengawa sereta sida sebilik,urung RM23.8 juta.

“Reti nya kami udah mayar RM23.8 juta bungai ganti rugi ngagai semua pengereja pengawa ke ditinggang penusah dalam taun 2016,” ku iya.-UB