KPDNKK: Orang ti ditemu nyual barang jai deka diukum

KUCHING: Opis Menteri Dagang Dalam Nengeri, Koperasi enggau Pekara Bebeli Barang (KPDNKK) Sarawak enda bebatak asur enggau sesapa ke ditemu ngumpul barang jai lalu nyual baru barang nya ngagai penguna, ke alai sida deka ditinggang ukum ari baruh ‘Akta Perlindungan Pengguna’.

Berindik ari pekara nya, Ketuai Penerit Adat KPDNKK Sarawak Abdul Hafiz Abdul Rahim ngelalau sesapa ke ngereja penyalah ke ngelanggar Akta nya deka, diukum.

Iya madahka nya nyengkaum orang ke ditemu ngambi lalu nyual baru sayap manuk ke dibuai baka ke nyadi di Bagi Menua Sibu, baka ke diripot dalam surat berita kemari.

“KPDNKK enda nemu sapa ke ngereja (kes sayap manuk di Sibu), tang aku deka ngelalau sesapa ke ngumpul sayap manuk nya lalu nyual baru ngagai penguna, kami deka bejalaika atur ari baruh Akta Perlindungan Pengguna. Kitai enda bebatak asur pasal pekara tu.

“Kami deka matau pekara tu, kami enda ulih nagang pekara tu laban kami enda nemu sapa ke ngereja lalu sida ke ngambi pan kami enda nemu sapa,” ku iya lebuh ditanya pasal kes nya dalam aum pengarang berita, kemari.

Hafiz mansutka penemu nya lebuh dipinta meri penerang bekaul enggau urung tiga tan sayap manuk ti ditumbak beberapa kaki penalam ba tanah ba tanah puang semak enggau Bukit Aup, Sibu, baka ke diripotka dalam surat kabar kemari.

Berebak enggau tu iya minta mensia mayuh enggau ejensi ke bisi penerang sereta bukti ti betul pasal kes sayap manuk nya, tau ngeripot ngagai KPDNKK.

“Laban enti bisi bukti ti betul, iya nya amat bisi orang ngambi sereta nyual baru sayap manuk ngagai penguna di Sarawak tu, kami (KPDNKK) deka meri ukum ti terit.

“Nyema ditemu ngereja penyalah nya sida deka diukum ari baruh akta nya ti deka ditinggang ukum maksimum sepenyampau RM250,000 tauka diukum jil tiga taun tauka kededua ukum nya sekali,” ku iya.

Hafiz lebuh ke ngenang pasal manuk nya, iya madahka manuk sebengkah agi barang ke dikemata perintah nengah Akta Kawalan Bekalan, ti semina ngenukuka bekal nya chukup diguna semua.

Iya madahka maya musim pengerami, KPDNKK ngatur Skim Kawalan Harga dikena ngenukuka bekal barang ke dikemata perintah nya chukup.

“Aku enda nemu sapa ke ngereja pengawa nya (kes sayap manuk), tang bekal ke guna mensia mayuh di Sarawak naka ke diatu endang chukup,” ku iya.-UB