Sadung penerang ke betul sereta baru nengah ’AZAM Online TV’

KUCHING: Kurang penemu tauka penerang pasal sekeda isu ti dipekunsi nengah media rama tauka internet ulih mai penusah sereta nguingka runding ngagai pekara ti negatif, nyengkaum pasal pengawa perintah ti deka ngemansangka rayat.

Sekretari Perintah Nengeri Tan Sri Datuk Amar Mohamad Morshidi Abdul Ghani madah, enti penguna media rama tauka internet ngena kereban nya meda lalu naburka penerang ti betul, nya deka meri pemanah. Berindik ari nya, iya ngarapka ‘AZAM Online TV’ ti ditumbuhka Angkatan Zaman Mansang Sarawak (AZAM Sarawak) ulih muka peluang baru ngagai AZAM ngerapitka kaul enggau bala Netizen (penguna Internet) kelebih agi nembiak rebak baru ba pengawa ngerembaika penerang enggau pemansang ti dibai perintah.

“Taja pan nengah internet ulih jampat bekunsi penerang, tang kekadang penerang nya engka enda betul tauka enda ulih diperetika laban kurang penemu pasal sekeda isu tauka enda chukup dipadah enggau silik. T

Tu ulih mai penusah lalu nguingka ngagai runding ti negatif pasal sekeda isu.

“Taja pia, aku pechaya ‘AZAM Online TV’ ulih mantu perintah sereta ejensi ti bekaul naburka penerang pasal pemansang nengah multimedia ti meri isi ke bebatang lalu ulih narit ati sereta interaktif ngagai mensia mayuh.

“Internet tauka media rama tu beguna, laban kitai ulih bekunsika berita pasal pemansang enggau penerang betul ke nyadi di serata menua ti ulih dipeda tauka ditemu ukai semina orang ke diau ba mengeri nyengkaum di menua pesisir,” ku iya ke mega Chairman AZAM Sarawak.

Morshidi bejaku munyi tu lebuh bejadika ‘AZAM Online TV’ enggau Youth Forum On Internet And Social Media: Internet in The Age of The Millennilas ti diatur AZAM Sarawak ba sebengkah hotel ditu, kemari. Nandu baru, iya madahka pangka ari ‘viral’ (ulih ngelekai) sereta ‘cut and paste’ (ambi lalu tampal), kelebih agi dalam media rama, enda ngira dini endur penguna endang ulih bekunsika penerang dalam beberapa sikin aja, ti ngundan pemanah enggau penyai.

Ngenang penumbuh ‘AZAM Online TV’ iya ngarapka AZAM Sarawak ulih nyendiaka pekara baru pasal nengeri tu nyengkaum adat enggau main asal, raban bansa sereta pemansang ti nyadika nengeri tu menua maju nyerumba taun 2030.

AZAM Sarawak patut nguna peluang tu ngempitka kaul enggau genap serak raban bansa, nengah program pemansang, ku iya.

“Aku arap endar isi berita ti manah ulih narit ati ukai semina bala ke biak sereta peranak menua tu aja tang nyengkaum orang ari menua luar,” ku iya.

Bela bisi ba pengerami nya kemari Ketuai Pemesai Eksekutif AZAM Sarawak, Datuk Aloysius J. Dris enggau ke bukai.-BP