Anang kelalu bepanggai ngagai subsidi ke diberi perintah- Mong

SRI AMAN: Perintah udah nyediaka mayuh bengkah subsidi ngagai rayat nengah bemacham polisi, pia ku Menteri Muda Betanam Betupi Chara Moden (Pansik enggau Makit) Datuk Mong Dagang.

Iya madah, tuju perintah meri subsidinya awakka pengidup rayat ninting hari berasai lantang emda ngira sekalika sida diau ba kandang mengeri tauka ba menua pesisir.

“Enggau jaku bukai, subsidi tu endang seiti perengka guna ungkup rayat lalu rayat ngasaika utai tu meseti diberi sepemanjai maya.

“Ketegal kelalu bepanggai ngagai subsidi tu ngujungka rayat enggai ngiga penatai bukai dikena nambahka pemeri perintah lalu sekeda bisi mut-mut nyema subside nya enda diberi agi,” ku iya.

“Ambika chunto ba pengawa bumai, pengawa meri subsidi baka baja enggau bantu bukai mandangka rayat kelalu bepanggai ngagai subsidi tajapan sida agi ulih meli kediri utai ke diguna kena bumai.

“Enggau jaku bukai, subsidi nya diberi perintah dikena rayat ngepunka pengawa bumai udah asil pansut sida ulih ngemansangka agi pengawa sida lalu awakka nadai agi bepanggai ngagai subsidi,” ku iya.

Mong madah munyi nya rambai Pengerami Ngiling Tikai Gawai Dayak diatur Gerempung Pengintu Pengelantang, Sebelas Buah Rumah Panjai ba kandang menua Dau/Undop begulai enggau Opis Pemadah Malaysia Pelilih Menua Sri Aman bepalan ba Rumah Musa Lutang, Kampung Sutong Sri Aman ditu kemari.

Iya mega ngelalau rayat ngambika enda kelalu bepanggai ngagai subsidi ke diberi perintah tang sida ulih nyediaka pekara ke diguna nengah pengeransing diri empu. Iya mega madah nengah Opis Menteri Betanam Betupi Chara Moden Sarawak udah numbuhka mayuh program dikena nulung raban orang bumai ngemansangka asil betanam betupi sida.

“Opis Menteri Betanam Betupi suah ngatur mayuh bengkah kus ngagai raban orang bumai kelebih agi ngagai sida ke ngereja pengawa bumai dikena nambahka penatai pemisi sida.

“Nengah kus ke diberi nya sida bulih mayuh agi penemu dikena besemekih enggau nadai agi bepanggai ngagai subsidi ari perintah.

“Asil iya, mayuh orang bumai udah mujur taja nadai bepanggai ngagai subsidi ari perintah. Kelimpah ari nya, Opis Menteri mega udah nyediaka teknologi baru dikena ngangkatka asil betanam betupi ke lalu nyungkak penatai pemisi rayat”.

“Nama utai ke meri penanggi iya nya bisi orang ke nadai betanggungjawap enda betul lebuh nguna subsidi ke diberi perintah enggau chara ngulihka penguntung ungkup diri empu aja lalu tu meri pengerugi ngagai perintah ti udah meri subsidi nya,” ku tandu iya.

Ba pengerami nya mega, iya mega muji pengawa ke digaga sebelas buah rumah panjai nya ke udah numbuhka Gerempung Pengintu Pengelantang Pendiau nya laban udah mujur mantu rayat ke dituntung penusah enggau utai bukai.

Enggau jaku bukai, iya ngasuh gerempung nya terus chakah agi ngereja pengawa ngambika orang ke nyadi kaban terus ngasaika pengelantang.

“Laban ke nyadi Kaban Kunsil Nengeri (ADUN) sitak Bukit Begunan endang udah naydi tanggungjawap aku nentuka pengelantang pendiau rayat ditu dijaga enggau meruan lalu gerempung tu nyau ngelempungka tanggung pengawa aku,’ ku iya.

Rambau pengerami nya, iya bisi nyebut deka meri RM 10,000 bantu ari perintah ngagai gerempung nya dikena sida bejalaika program sepemanjai taun tu.

Berebak enggau nya, Mong bisi nyuaka dua lambar chek RM 15,000 ke dibagi dua buah Komiti Pemansang enggau Pengelikun Kampung (JKKK) iya nya JKKK Rumah Musa, Sutong nerima RM 10,000 enggau JKKK Rh Jelang, Batu Besai Tengah nerima RM 5,000.

Pengerami nya ditutup enggau pengawa Ngetas Ranyai enggau Ngiling Tikai. Bela bisi datai iya nya Pemesai Pekara Khas (KASA) Sarawak (DUN) Bukit Begunan, Jesi Bintoh Suntek, pengari Pemesai Opis Pemadah Sri Aman, Salleh Immun, Pribit Sekretari Datuk Mong, Howard Tambom, Tuai Rumah Storey, Tuai Rumah Musa enggau lebih kurang 40 iku Tuai Rumah ari kandang menua Entulang, Melugu enggau Undop. -BP