Jabu besemaya nyaup mutarka penanggul sida

KUCHING: Komiti Pe­mansang enggau Penge­likun Genturung Pen­diau (JKKK) Desa Wira, Batu Kawa ngarapka Sapit Kepala Menteri Datuk Patinggi Tan Sri Alfred Jabu ulih nyaup mutarka sekeda penanggul sereta pemar ke ditapi sida ke nguan genturung nya.

Berindik ari pengangkun peranak menua dia ke perin­tah Barisan Nasional (BN) tajapan nadai pengari nga­rika sida pengudah pemutus pengawa bepilih bedau lama tu tadi, Pengulu Sidu John (Zon Batu Kawa) madah, pengelantang sereta penge­likun ungkup genturung nya seruran dikemeratka belama.

“Pengari kami, Datuk Yong Khoon Seng alah maya pengawa bepilih apin lama ke udah, taja pia peranak di genturung pendiau ditu endang angkun ke perintah BN.

“Apin lama ke udah, aku betemu enggau Jabu lalu nelai iya senentang pemar ke ditapi peranak menua genturung nya pengudah BN alah.

“Jabu besemaya deka nyaup lalu minta semua pekara dikenatai terus ngagai iya,” ku Sidu lebuh dik­erandau pemberita kemari.

Sidu ke mega ketuai kom­iti nya, bela digulu raban tuai rumah (TR) madah, komiti nya udah ngatur kerejasama enggau Opis Kaunsil Kandang Bandar Padawan (MPP) senentang pemansang sereta penge­likun ke patut dipenggi ngagai Desa Wira.

“Mayuh pengawa ke patut dipejalai baka ngemanahka parit, ngaga lampu jalai sereta bungkung jalai patut dikelengkas.

“Pekara tu udah dikeja­kuka enggau MPP ke alai kitai mega deka nganjung seiti surat bekaul enggau pekara tu ngagai Sapit Kepa­la Menteri.

“Arapka Jabu ulih ngarika kami di Desa Wira mutarka sekeda penanggul sereta pe­mar ti ditapi peranak menua di genturung pendiau ditu,” ku iya.

Sidu nambah, tiap iku kaban dalam komiti udah dibagi pangku pengawa diri baka matau pemanah enggau pemeresi parit, pemanah lampu enggau pekara penge­likun bukai. Raban TR ba komiti ti bet­uaika Sidu, iya nya TR Edward Jahai (Taman Desa Wira), TR Andam (Desa Wira Lot Fasa I), TR Robert Dino (Desa Ria Lot Fasa II) enggau Rantai Tading (Sekretari JKKK).-BP