RM750,000 dividen udah diungkup ngagai pengempu tanah di Simunjan

SIMUNJAN: Seraban 177 iku ke beempuka tanah ari Genturung Pendiau Giam Lama enggau Genturung Pendiau Mawang udah dibayar KTS Pelita (Simunjan) Sdn Bhd dividen RM750,000 kena Hari Empat tu tadi.

Asil nya diulih ari ladang sawit ba kededua genturung pendiau ke urung 120 KM ari Kuching. Sida disadang deka nerima asil ke mayuh agi enti ba taun ke dudi ila enti sida meri kerejasama ke penuh ba pengawa sama ngemansangka tanah begulai enggau kom-peni peribit, perintah.

Ketuai Pemesai Eksekutif KTS Pelita (Simunjan) Sdn Bhd, Desmond Cheng madah kerejasama nya beguna amat ngambika ulih ngemansutka asil ti mayuh agi taun baru.

“Tu deka nyadi pemun ba mayuh bengkah pekara ti ngagaka ati. Aku meri terima kasih ngagai kita semua ke ari baruh pegai komiti pemansang kandang menua (ADC). Kami arapka kita ulih meri kerejasama ke manah agi dudi ila,” pia ku iya bejaku ba pengami mit nyuaka dividen ngagai orang ke beempu tanah ba opis KTS Pelita (Simunjan) Sdn Bhd ditu.

Cheng mega madah, pengawa ngempang jalai ti dipejalaika ba dua bengkah endur di ladang nya udah ngerugika sida urung RM1.5 miliun.

Nya alai iya minta orang ti beempu tanah mutarka penanggul nya nengah chara ke manah kena nyeliahka pengerugi ke baka nya ke tau ngeruga penguntung tauka dividen sida ke dudi ila.

“Ba pengawa ngempang jalai ti ke penudi endar tu tadi kami udah rugi RM1.5 mil-iun, tang kami naka ulih nguji ngulihka untung baru.”

Bekaul enggau ADC, iya madahka komiti nya deka ngatur pengawa milih ketuai enggau komiti baru seraya arap endar ati komiti nya ulih numbuh tim ke regas sereta ulih nyaup ngemansangka pengawa ti dipejalaika ba ladang lalu nguji mutarka penanggul bukai.

Kami arapka komiti enggau orang ti beempu tanah ngedutka kaul enggau KTS Pelita (Simunjan) Sdn Bhd sereta mantu ngambi ulih nyadika chunto ba pengawa begempung ngemansang-ka tanah enggau kompeni (JVC).

“Kami deka ngaga tu sebengkah JVC chunto ti be-jalaika pengawa manah agi ari kompeni bukai.”

Berebak enggau nya, Ket-uai ba Genturung Pendiau Giam Lama, Bali Bandan ke mega seiku ari penyereta minta orang ti beempu tanah meri kerejasama penuh ngagai KTS Pelita (Simunjan) Sdn Bhd ngambika bulih asil ke mayuh agi dudi ila.

Ku iya, orang ke beempu tanah patut berundingka gaya pengidup sida jemah ila nengah chara bulih dividen ke mayuh agi ari ti ngaga pen-yarut enggau pemaju tauka perintah.

“Kami patut nyeliahka penyarut sereta ngarapka kitai nerima dividen ke mayuh agi. Aram meh kitai begem-pung enggau KTS Pelita (Simunjan) Sdn Bhd ngemujurka juluk nya.”

Laban ukai semua 177 iku ke beempu tanah ulih datai nerima dividen, Cheng enggau komiti kaul KTS Pelita (Simunjan) Dato Vincent Chapman bejalai ngagai tetiap pintu sereta nyuaka chek ngagai ngelui lima iku penerima nya.

Seiku ari sida nya, Gilanggang Gambol ari Genturung Pendiau Mawang ti bejalai mindah kin kitu ngena tungkat. Ketuai Genturung Pendiau Mawang Gelanggang Sanga madahka Gilanggang idup kedediri.

Ladang sawit ba Genturung Pendiau Giam Lama enggau Genturung Pendiau Mawang dibuka dalam taun 2003. Tu sebengkah projek ti dikemansangka begulai enggau KTS Pelita, pengempu tanah sereta Kaunsil Pemansang enggau Pengintu Tanah (LCDA) ti nyadi ejen pengemata.

Projek ngemansangka tanah nengah chara begempung tu dipunka perintah kena ngemansangka tanah adat bansa asal (NCR) ti enda ditejuka puang ngelama tu.

Bisi datai ngulu pengawa nya Sapit Pemesai Pengatur Pengawa ba Opis Menteri Pemansang Tanah, Untan Rajit enggau Menijer Kan-dang Menua LCDA, George Lentton.-BP