Jalai ari Batu 10 nyentuk Batu 15 deka dikemesai, dikemanah pun taun baru

KUCHING: Projek ngemanah sereta ngemesaika jalai dua alur ari Batu 10 ngagai Batu 15 ditu, begunaka belanja RM80 juta, dipelabaka dipejalaika pun taun baru pengudah projek nya dikemandarka perintah besai.

Menteri Pemansang Infrastruktur enggau Peyambung Dato Sri Michael Manyin Jawong madah, projek nya diatu udah ngembuan langkar, semina nganti dipejalaika.

“Projek tu udah dikemendarka perintah besai enggau ungkus belanja RM80 juta, ti mungkur pengawa ngemanahka jalai ngagai dua alur ari Batu 10 ngagai Batu 15 ti pemanjai 8 kilometer.

“Langkar projek udah bisi, semina diatu kitai benung nganti pemendar ari perintah besai lebih agi Kementerian Kewangan muka tinda sereta ngarapka ulih berengkah dipejalaika pun taun baru,” ku iya.

Pekara nya dipadahka iya dalam aum pengarang berita pengudah bejadika ‘Road Attribute Data Logger and Inspection System’ (RADIS) ulih Institut Pemansik Pengelikun Jalai Alun (MIROS) ti digulu Ketua Pengarah MIROS Profesor Dr Wong Shaw Voon ditu, kemari.

Nitihku Manyin, projek ngemanahka jalai nya, sebagi ari projek ngemanahka jalai ngagai dua alur di sepemanjai jalai besai di Sarawak.

Iya madah, opis menteri iya udah ngenataika pekara nya ngagai perintah besai bekaul ngemanahka 770km jalai ngagai dua alur di nengeri tu ti ngena ungkus belanja RM9 billion ngagai RM12 billion.

“Kitai deka ngemanahka 770km jalai ngagai dua alur ti berengkah ari Miri nyentuk ke Serian, kebuah iya laban dalam Kuching udah tembu sereta beberapa kandang endur di Sibu udah dipejalaika lalu semina tinggal 770km aja,” ku iya seraya ngarapka ulih dipejalaika enggau lengkas.

Manyin mega madahka 15 agi alur endur begelih di jalai besai ari Miri ke Kuching deka ditembuka sebedau ujung Lumpar Pemansang Malaysia Ke-10 (RMK-10).

Ku iya alur begelih nya ditentuka Jabatan Kerja Raya (JKR) Sarawak, tu suah endur penusah bebadi ba jalai alun nyadi di sepemanjai 900km jalai besai.

“Di Sarawak, JRK udah ngelala bagi jalai ke suah endur penusah bebadi ba jalai besai ari Miri ke Kuching, nya alai JKR deka ngaga 95 alur endur begelih ba endur nya, diatu benung dipejalaika.

“Kami ngaga alur begelih sepemanjai satu km enggau penyauh 8km entara satu (alur begelih ngagai alur begelih ke bukai),” ku iya.

Kelimpah ari nya Direktor JKR Sarawak Zuraimi Sabki madah, nyentuk diatu urung lima alur begelih udah ditembuka sereta 15 agi deka ditembuka sebedau ujung RMK-10.

“Taja pia tu program ti enda ngetu lalu bisi entara alur tu benung digaga lalu ke bukai deka dipejalaika di baruh RMK-11 laban projek tu udah dikemendar sereta bisi bajet,” ku iya.-BP