Ketuka penemu negatif pasal Polis Bantuan

Foto Polis Sarawak.

KUCHING: Penemu enggau runding ti madahka Polis Bantuan nya pemesai polis kelas kedua patut diubah.

Kebuah pia ku Direktor Opis Penagang Pengawa Jai enggau Pengelikun Raban Bansa Commissioner Police (CP) Dato Wira Ayub Yaakub, laban raban Polis Bantuan tu mega bejalaika tanggungpengawa nyaga pengelikun, sebaka enggau raban polis.

Penumbuh Polis Bantuan ku iya muka jalai enggau kolaborasi entara polis enggau ejensi baka Lembaga Amanah Kebajikan Masjid Negeri sarawak (LAKMNS) ti beratka pengelikun ngambika tiap iku orang ulih ngasaika diri likun, ku iya.

“Ke pengingat kitai semua Polis Bantuan tu ukai pegawai polis kelas kedua sida sama megai tanggungpengawa, nyaga pengelikun sebaka enggau pemesai polis bukai. Sida dilatih kami tang gaji sereta pengelantang raban Polis Bantuan tu bepanggai ba ejensi ke minta sida ditumbuhka.

“Kami ngarapka raban Polis Bantuan ti nyadika penyambung entara raban bansa, ejensi enggau polis, laban sida tu sebedau tu nyadi raban bansa lalu dilatih ngambika meri servis ngagai raban bansa, ari tu kitai ulih nemu nama ti dikedeka tauka diguna (raban bansa).

“Ditu kami udah ngemandarka 124 iku Polis Bantuan ungkup Lembaga Amanah Kebajikan Masjid Negeri Sarawak (LAKMNS), enti agi beguna kami ulih nambah laban lebih mayuh agi raban Polis Bantuan dia raban polis ulih mekuh ngagai endur ti nadai polis bantuan,” ku iya seraya madahka polis bantuan mega bisi ditumbuhka ba kebun bedandang besai.

Ayub mansutka pekara nya lebuh bejaku ba Majlis Penyerahan Sijil Polis Bantuan LAKMNS ke diatur ba Bangunan Baitulmakmur ditu, kemari.

Kelimpah ari nya iya mega nesau sereta meransang mayuh agi peranak nengeri tu minta nyadi Polis Sukarelawan.

“Kami udah ngemendarka 50,000 pengawa nyadi Polis Sukrelawan, nya alai kami minta kerejasama polis ari nengeri Sarawak ngambika mayuh agi raban bansa nengeri tu nyereta raban Polis Sukarelawan.

“Setiap taun kami nagit serata menua ulih ngambi 10,000 iku Polis Sukarelawan, lalu ari penyampau nya kami ngarapka beberapa ribu iku ari Sarawak,” ku iya seraya madahka raban Polis Sukarewan bejalaika pengawa nyaga pengelikun di sekula, kandang genturung pendiau enggau kebukai.

Pemesai dipebasaka bejadika pengeremai nya kemari Menteri Pengawa Berumah ti mega Sapit Chairman LAKMNS Datuk Amar Abang Johari Tun Openg enggau ke bukai.-BP