PKS enggau Kongres Gerempung Dayak Miri ngaga ripot polis pasal akaun FB JIM

MIRI: Dua bengkah ripot polis udah digaga pasal Jemaah ISIS Malaysia (JIM) ketegal penerang ke dipan­sut dalam ‘Facebook’ nguji ngerachun runding sereta begedika bansa bukai.

Kededua ripot polis nya udah digaga Serakup Kayan Sarawak (PKS) Pelilih Miri enggau Kongres Gerem­pung Dayak di Miri enggau Baram ba Indu Balai Polis Miri, ditu. Ku pengari Kongres Day­ak di Miri enggau Baram, Jabu Lasa ari Sungai Se­batang, Marudi, penerang JIM ke dibantaika dalam akaun Facebook ti diempu JIM-Jemaah ISIS Malaysia sereta disadung nengah la­man sosial, ukai semina deka ngerachun runding, tang tau nempa penyarut entara pupu raban bansa di Malaysia.

Antara pekara ti diban­taika dalam penerang JIM, iya nya ngarapka ISIS ulih mumpung pala bansa bukai kelimpah ari Melayu Islam di Malaysia lebih agi di Sabah enggau Sarawak ke dianggap ‘negeri kafir’ sereta mega ngemendarka bala indu Dayak tau dibai tinduk laban ke ‘halal’, enda ngira tikas umur sereta tau dibunuh enti sema lalu betubuh bisi.

Seiku exco PKS Miri, Mathew Silek, ti ngarika serakup nya madah, pen­erang ti dipansutka JIM nya tampak bendar deka ngerachun runding sereta enda setipak enggau polisi Rukun Tetangga.

“Ngarika PKS Miri, aku ngaga ripot polis tu ngam­bika polis ulih nasat enggau silik sereta ngukum orang ti mansutka penerang nya,” ku iya.

Nengah awak nya mega,Jabu tauka Mathew meransang Kaunsil Komu­nikasyen enggau Multimedia Malaysia (SKMM) neritka adat,nutup akaun sereta ngelala orang ke ngempu nya , ngambika dipechara.

Ensanus, Exco Nembiak SPDP ditu sama bela udah ngaga ripot polis bekaul enggau pekara nya. Ripot ke sebaka mega digaga ba Balai Polis Tanjong Lobang ditu.-BP