PDRM: Anang Muntang Pechayaka Kerembai Berita Bula

KUCHING: Polis Diraja Malaysia (PDRM) Kontijen Sarawak ngelalau orang mayuh ngambika enda arapka penerang bula ti dikerembaika bekaul enggau pengawa nabanka anak mit enggau pengawa bejual palsu di bandar tu.

Ketua Jabatan Siasatan Jenayah (JSJ) Sarawak Dato Pahlawan Zulkifli Hassan bebendar minta orang mayuh ngambika enda arapka penerang nya ti dikerembaika nengah media rama iya nya penaban nya benung bekesegau di Kuching lalu nagit anak mit ti beumur 15 taun ke baruh.

Nitihku iya nengah penerang berita ke dikeluarka ditu kemari, pengerembai penerang bula nya madahka penaban nya bisi di kandang menua Petra Jaya, Lundu, Bau, Kota Samarahan, Serian enggau Sematan.

Sida nya dipadahka ngena kereta Perodua Viva bechura burak enggau sebuah van merah ti dipelabaka enggau kes nabanka anak mit sereta nyual perengka tubuh mensia.

“Polis Diraja Malaysia Kontijen Sarawak nyangkal pengerembai penerang tu.

“Taja pia piak polis seruran matau dikandang sekula enggau kandang endur ke suah dilawa orang mayuh,” ku iya.-BP