Muhyiddin: Pebasaka Pemutus Ngemeranka Akta Hasutan 1948

BINTULU: Perintah Menua Malaysia ngembuan kuasa penuh dikena nentuka sebarang pemutus bekaul enggau pengelikun menua tu kelimpah ari ngetanka guna undang-undang ke udah lama dikemeranka bekaul enggau Akta Hasutan 1948, ku Sapit Menteri Besai, Tan Sri Muhyiddin Yassin.

Iya madah, pemutus ti ngetanka akta nya enda ibuh diseridi agi laban pemutus nya udah mujur bulih sukung semua piak.

“Aku enggai enda ngingatka semua piak ngambi anang sekekali masuk champur dalam pekara ke bekaul enggau undang-undang pengelikun di nengeri tu,” ku iya.

Iya mansutka jaku nya lebuh bejadi Aum Besai Tiga Taun Sekali Parti Demokratik Progresif Sarawak (SPDP) 2014 ke diatur di Dewan Suarah Bintulu ditu, ensanus.

Bejaku ba pengerami nya, Muhyiddin ngarapka rayat menua luar bebasaka perintah menua Malaysia laban ku iya, Malaysia enda kala champur jari dalam pekara politik menua luar.

Iya madah munyi nya lebuh nyaut penemu enggau petenah mayuh piak nyengkaum Sapit Presiden Amerika Syarikat Joe Biden sereta Duta Besai Amerika Syarikat di Malaysia Joseph Kahn ke betenahka pemutus perintah menua Malaysia ke terus ngemeranka ‘Akta Hasutan’ nya.

“Aku madah ngagai semua, ‘Akta Hasutan’ tu deka terus dikemeranka di menua tu sereta deka dikenegapka agi ari semua sukut,” ku iya.

Kena 17 November empai lama ke udah, Menteri Besai Datuk Seri Najib Tun Razak madahka Akta Hasutan 1958 deka terus dikemeran sereta ngungkupka dua bengkah atur khas dikena nyaga pengelikun pengarap Islam enggau bedawa sesapa aja ke ngajum nguji ngemai nengeri Sabah enggau Sarawak pansut ari Malaysia.-BP