SCORE Nyediaka Peluang Pengawa Ngagai Peranak Nengeri Tu- Len

SIBU: Koridor Energi ke Ulih Dikena Baru Sarawak (SCORE) nyediaka peluang kereja ngagai peranak menua tu empu, ku Menteri Muda ba Opis Kepala Menteri (Promosyen Pelajar Teknikal) ke mega Menteri Muda Rampa Menua, Datuk Len Talif Salleh.

Iya madah, urung US$10 juta agih belanja udah diungkupka ngagai industri berat SCORE di pelilih menua Mukah, Samalaju enggau Tanjong Manis.

“Asil produk ari industri nya deka dieksport ngena kapal ngagai menua luar ke dipegai ejensi pengawa dagang dunya iya lebih kurang dalam 95 peratus.

“Kebuah pia, lebih mayuh raban pengereja pengawa deka diguna dalam industri tu iya nya manggai 70 peratus pengereja pengawa ari peranak menua tu dalam taun 2016 ti deka datai,” ku iya.

Iya mansutka penemu nya lebuh bejadi pengerami Graduasyen Akademi Maritim Pelita Maslaut ditu, kemari.

Naka ke diatu, Len madah, raban pengereja pengawa dalam industri tu semina 40 peratus ari kompeni rayat menua Malaysia.

Sebengkah chara dikena nambahka pemayuh pengereja pengawa menua Malaysia gawa dalam industri tu iya nya apai indai patut meransang anak sida ke tembu besekula ngeradang peluang ngulihka penuduk mangku pengawa dalam industri tu lebih agi sida ke ngembuan pengelandik dalam bidang teknikal.

Kelimpah ari nya, sida patut belajarka lebih mayuh pengelandik dalam bidang teknikal ngambika muntang bulih pengawa dalam industri tu laban ku iya, pangku pengawa dalam industri tu nyendiaka batang gaji ke besai.

Beserimbai enggau atur pengawa nya, bisi 132 iku raban pelatih akademi nya nerima setipikit tembu belajar.

Sama bisi datai ba atur pengawa nya, Direktor Opis Marin Wilayah Sabah Rosnan Fathlal, Direktor Opis Marin Wilayah Labuan Benjamin Bernard Bijion sereta Menijar Besai Akademi Maritim Pelita Maslaut Sdn Bhd Mohamad Nazim Masni.-BP