FAMA Sarawak Mantu Peranak Menua Pakan Ke Tasah Ampuh Bah

PAKAN: Opis Dagang Betanam Betupi Perintah Besai (FAMA) Sarawak bagi menua Sarikei udah mujur meri bantu ngagai peranak pelilih mit menua Pakan ke dituntung penusah tasah bah empai lama ke udah, ensana.

Pemesai FAMA Sarawak bagi menua Sarikei, Layan Nanang madahka bantu dalam mayuh bansa pemakai nya disuaka ngagai Pemesai Opis Pelilih Menua Pakan ke mega Chairman Komiti Penyah Penusah, Alex Liau.

“Semua bantu nya udah dikenataika. FAMA ngarapka bantu tu ulih ngelempungka tating penusah pengidup ke ditapi peranak ke dituntung penusah tasah bah,” ku iya.

Kelimpah ari nya, ku Alex, mensia mayuh nyengkaum raban pengereja pengawa perintah, sektor peribit sereta gerempung ukai dikuasa perintah (NGOs) terus meri bantu ngagai palan ngumpul barang bantu kenyau beberapa hari ti ke udah.

“Kitai meri besai terima kasih ngagai semua piak ke gerah jari meri bantu ngagai peranak ke dituntung penusah tasah bah di pelilih menua tu.

“Kuasa pungkal pengawa ari mayuh piak tu patut dipuji sereta patut diteruska sebarang maya,” ku iya.

Berebak enggau nya, Pemesai Opis Pengelikun Mensia Mayuh Malaysia (JPAM) bagi menua Sarikei, Mohamad Noor Amit dalam penerang iya kemari madahka ejensi nya mega deka muka palan ngumpul barang bantu ungkup mensia mayuh belabuh ari pukul 8.00 pagi nyentuk ngagai pukul 5.00 lemai.

“Palan tu dibuka alai nerima bantu ari palan ngumpul barang bantu besai sereta bantu ari peranak ditu.

“Entara barang bantu ke tau diberi ngagai palan tu iya nya pemakai, pekayan sereta mayuh agi ke bukai,” ku iya.

Nangkanka nya, iya ngelalau mensia mayuh ngambika seruran mending sereta beratika sebarang jaku gerah bekaul enggau gaya mua hari sereta bah kelimpah ari dipinta besedia mindah enggau lengkas ngagai palan ke likun agi enti nyema gaya mua hari majak jai lalau tau ngujungka bah nyadi.

“JPAM udah besedia napi sebarang pekara ke enda disadang nyadi beduduk ari penusah ke sama,” ku iya.

Mensia mayuh ke ngembuan sebarang tanya ke deka dikenatai tau terus telefon ngagai Pusat Kawalan Operasi JPAM bagi menua Sarikei nengah lumur 084-659958 tauka 012-8757022.-BP