Duit KWSP Mengkang Ulih Dipansutka Umur 55 Taun

KUALA LUMPUR: Menteri Besai Datuk Seri Najib Tun Razak kemari nyemetak madahka kaban Opis Wang Turu Pekereja (KWSP) agi ulih ngemansutka duit sida maya umur udah manggai 55 taun.

Iya madah, KWSP deka netapka atur ke lebih manah nyema bisi kaban baru ngaga pemutus terus gawa taja umur sida udah ngelui 55 taun.

“Tuju tu ngambika rayat ulih nyepi asil titik peluh sida maya umur manggai 55 taun sereta terus nyaga pengelantang sida nyema pinchin umur 60 taun,” ku iya rambau Invest Malaysia 2015 ditu, kemari.

Sapit Menteri Besai Tan Sri Muhyiddin Yassin bela datai ngulu program nya.

Najib madah, taja perintah nemu pemesai reti guna duit simpan nya maya udah pinchin umur 60 taun, tang perintah seruran mendingka penemu rayat sereta bebasaka peminta sida ke deka ngambi duit nya maya umur udah manggai 55 taun.

“Aku mega bisi ninga pengirau ati mensia mayuh sentang ubah ke nyadi dudi hari sentang atur KWSP. Dalam kandang dua hari randau digaga empai lama ke udah, lebih 50,000 rayat Malaysia sama ngambi bagi ngemansutka penemu diri.

“Tu entara buah penemu ari mensia mayuh ke pemadu mayuh nerima timbal naka ke diatu,” ku iya.

Pansik sebedau tu kala digaga bepun Hari Dua lalu tembu kena 5 Mei 2015.

Empai lama ke udah, KWSP diripotka sedia nginsur tatak umur ngemansutka duit KWSP ari 55 ngagai 66 taun, lalu nerima bantah ari mensia mayuh.-Bernama