Pemansang, Pemujur Ekonomi Nengeri Tu Bepanggai Ba Pengelandik T&V- Tengah

KUCHING: Pemansang sereta pemujur ekonomi nengeri tu bepanggai ba pengereja pengawa ti ngembuan pengelandik teknikal enggau vokasyenal (T&V) dalam industri bepelasarka inisiatif SCORE.

Taja pia, pemujur pemansang industri sereta ekonomi bepanggai endar ba pemisi tauka penadai pengereja pengawa ke pengelandik sereta bepenemu.

Menteri Pemansang Industri Datuk Amar Awang Tengah Ali Hassan madah, atur tu ukai semina ulih mantu matak peneka pemeranak pukuk di menua tu tang mega meri pemujur ngagai ekonomi penatai pemisi ke besai sereta ngurangka seraka penatai pemisi entara rayat ba kandang mengeri enggau menua pesisir.

“Perintah mega udah chakah ngemansangka modal mensia sereta beratika pemayuh rayat Sarawak dilatih dalam pengelandik sereta penemu ti tau dikena industri,” ku Awang Tengah lebuh nyimpul perambu dalam Aum Kunsil Nengeri Ke-17 seraya nyaut tanya ari Kaban Kunsil Nengeri (ADUN) ari Tamin, Lingga, Kedup, Bukit Kota, Jemoreng enggau Telang Usan ditu, ensana.

Tiga pekara ti endang dikemerat ku iya, Ngerembaika Kapasiti Pengawa Latih nengah 92 palan Pelajar Teknikal enggau Pengawa Latih Vokasyenal (TEVT) ngeluarka 25,000 pemegai setipikit pengelandik teknikal setaun.

Nitih pansik UNIMAS ba 2010, menua tu begunaka urung 40,000 pemegai setipikit pengelandik TEVT setaun ngambika ulih napi peminta ari SCORE.

Baka nya mega ku iya, persepsi sereta penemu komuniti ke negatif ba latih teknikal enggau vokasional, lebih agi bala nembiak ke benung besekula sereta ke udah nembuka pelajar, patut di ubah.

“Pengawa ngemerat sereta ngatur pekara pelajar dalam teknikal benung diperatika Unit Pemansang Pengereja Pengawa di Opis Kepala Menteri enggau ‘Tabung Ekonomi Gagasan Anak Bumiputera Sarawak ‘(TEGAS),” ku iya.

Naka bulan April 2015, bisi empat program besai ti udah dipejalai iya nya Promosyen TEVT ba kem PLKN di serata Sarawak, Ekspo Halatuju enggau pelajar sereta Pengawa Teknikal, Program Begulai enggau Pengajar kaunseling sereta ‘Project of Dreams Realised’ ke digulu urung 9,514 mensia ari genap raban bansa.

Ke pengabis besai ti bisi diatur, iya nya program promosyen pelajar sereta pengawa diatur Sarawak Career and Training Fair (SCAT Fair) ke-4 ti udah dipejalai kena 7- 8 March tu tadi, ku iya.

Berindik ari nya, program sereta kus ti disediaka palan pelajar enda tau enda relevan sereta ulih napi peminta industri.

“Barang pengilap ba bansa latih nya deka ngujungka pengawa industri enda diisi lalu tau ngujungka bala nembiak menua tu enda tegigaka pengawa setipak enggau pengelandik sida. Kena nyeliah pekara tu, perintah ngaga pansik beratika bansa sereta penyampau pengereja pengawa ti diguna lebih agi ba kandang SCORE,” ku iya.

Dua bengkah pansik deka digaga taun tu, ke alai ‘Institute for Labour Market Analysis’ (ILMIA) ari Opis Menteri Pengatur Pemayuh Pengereja Pengawa deka bekerejasama enggau Unit Pemansang Pengereja Pengawa di Opis Kepala Menteri mansik peminta industri betukang.

Lalu, pansik kedua, ti dipejalaika Unit Perambu Nengeri (SPU) dipinta ngeluarka Perambu Besai dalam pemansang Industri Minyak enggau Gis di Sarawak ti bela ngemeratka penyampau pengereja pengawa ke landik.-UB