Perintah Udah Melanja RM6.72 Biliun Kena Nyikap Perengkaguna Menua Pesisir -Jabu

KUCHING: Perintah udah melanja sepenyampau RM6.72 biliun tauka 99.29 peratus ari RM6.77 biliun ti dikemendar sereta diungkupka dalam timpuh 2010 ngagai 2014 kena ngemanahka perengkaguna mensia mayuh di menua pesisir.

Menteri Pemansang Menua Pesisir Datuk Patinggi Tan Sri Alfred Jabu Numpang lebuh nyimpul jurai opis menteri nya kemari madah, belanja nya dikena melanja lima projek pemansang di menua pesisir.

Iya madah, projek ti dipejalaika nya senipak enggau juluk besai perintah ti deka ngemansangka menua pesisir ti diatur nengah Program Transformesyen Perintah (GTP), Program Transformesyen Menua Pesisir (RTP) sereta Langgur Pemansang Lima (5) Taun Malaysia.

“Dikena ngangkatka pemansang perengkaguna mensia mayuh di menua pesisir Sarawak, belanja sepenyampau RM6.77 biliun udah diagihka perintah ungkup timpuh taun 2010 ngagai 2014.

“Lalu ari penyampau nya (RM6.77 biliun), RM6.72 biliun tauka 99.9 peratus udah dipelanja dikena bejalaika projek di menua pesisir.

“Projek nya nyengkaum Projek Jalai Menua Pesisir (JALB) enggau Projek Jalan Perhubungan Desa (JPD) ti begunaka belanja sepenyampau RM2.18 biliun, Projek Bekal Ai Beresi Menua Pesisir (RM1.99 biliun); Projek Bekal Elekterik Menua Pesisir (RM2.02 biliun), Program Bantuan Rumah (RM524.04 juta) enggau Program Desa Lestari RM7.98 juta,” ku iya ba Aum Keterubah Renggat Kelima Kunsil Nengeri Sarawak Ketujuh Belas kemari.

Iya madah, projek enggau program ti udah diperambu enggau dipejalaika perintah mujur ngangkatka pemanah perengkaguna mensia mayuh, utiliti enggau infrastruktur nengeri.

“Projek pemansang tu deka terus dipejalaika dalam Langgur Malaysia Lumpar Kesebelas (RMK-11) dikena ngenyakah sereta ngenegapka semua pemansang infrastruktur.

“Nya alai aku meransang ADUN Meradong (Ting Tze Fui) ngambika meri kerejasama enggau perintah nengeri tauka besai bejalaika projek pemansang infrastruktur ba sitak nya lalu ukai semina bepanggai ba perintah aja,” ku iya.

Nambahka nya lebuh nyimpul jurai, Jabu ti nyaut tanya ari Mohammad Razi Sitam (BN-Saribas) madah, Jalai Tuie / Supa/ Manggut pemanjai 16 kilometer enggau ungkus belanja RM72 juta enggau Jalai Kampung Supa / Kampung Medang pemanjai 7 kilometer enggau ungkus belanja RM4 juta udah tembu magang bulan Jun 2014.

Penembu semua jalai nya ku iya, peranak Kampung Tuie, Kampung Supa, Kampung Medang enggau Kampung Manggut ti dalam bungkur Kawasan Pembangunan Pertanian Bersepadu (IADA) Kalaka-Saribas ulih dilawa nengah jalai nya.

“Laban jalai nya baru tembu digaga, dia perintah ngasaika jalai muntang ti nyambung Jalan Suri Debak ngagai Kampung Tuie enda patut digaga.

“Perintah mega udah ngemendarka tiga projek jalai ladang taun tu iya nya Projek Jalan Ladang Pekebun Kecil ba Kampung Manggut, Kampung Serembang enggau Kampung Medang enggau ungkup belanja RM889,600.

“Penembu jalai nya mega dia peranak menua nya ulih nyual asil betanam betupi ngagai pasar tauka mengeri ti semak,” ku iya ke mega Menteri Betanam Betupi Moden.

Kelimpah ari nya Jabu madah, Program Rimbunan Kaseh Negeri Sarawak ti keterubah udah dikemendarka ti bepalan ba Pusat Pertumbuhan Desa (RGC) Sundar, Lawas, ti berengkah dipejalaika 7 March 2015 sereta dipelabaka tembu unjung taun tu.

Nitihku iya Program Rimbunan Kaseh di Sundar nya deka meri penguntung iya nya bisi 100 unit rumah disedia sereta disikap aktiviti betanam betupi, gaji penyereta sepenyampau RM1,000 sebulan ba 6 bulan keterubah lalu RM1,500 ba bulan bukai nangkanka nya.

“Perintah udah merambu deka ngaga dua buah projek Rimbunan Kasih di nengeri tu iya nya di Sematan, Lundu enggau di Nyalau, Bintulu,” ku iya seraya madahka nya entara program ti dipejalaika di baruh Program Transformesyen Menua Pesisir (RTC).-UB