Penemu Sekeda Orang Ti Dekaka Sarawak Pansut Ari Malaysia Enda Patut Disukung

KUCHING: Pengawa enggau penemu sekeda orang ti dekaka Sarawak pansut ari perintah Malaysia, enda patut disukung tauka dititihka.

Penemu nya dipadahka Ketuai Sekretari Politik Kepala Menteri ti mega Chairman Kelab Penyukung Barisan Nasional(BNBC) Abdullah Saidol, lebuh dirandau pengarang berita pengudah ngulu pengerami ngingatka Sejarah Kemerdekaan Sarawak 22 Julai 1963 nyentuk 15 September 1963, ditu kemari.

Iya madahka diri nyukung penerang ti dipansutka Kepala Menteri Datuk Patinggi Tan Sri Adenan Satem ti nyebut Sarawak terus dalam perintah Malaysia suba, diatu enggau belama-lama iya.

“Aku amat nyukung pekara ti dipadahka iya (Kepala Menteri) tadi, lalu aku ti nya chairman BNBC mega nyukung Kepala Menteri ti madahka bisi pengamat pekara ti dibantaika Sarawak For Sarawakian (S4S) baka pasal pemansang enggau kuasa autonomi.

“Tang aku mega sepenemu enggau penerang Kepala Menteri tadi, ti enda nyukung Sarawak pansut ari Malaysia.

“Kitai enda bemunsuh enggau S4S, bisi mega pekara ti dibantaika sida nya ngena tauka amat, hipokrit enti aku madah pekara ti dibantaika sida nya enda betul, tang enti sentimen Sarawak pansut ari Malaysia kami endang amat enda setuju,” ku iya.

Lebuh ngenang Kepala Menteri ti deka berundingka ngemebdarka kemisi (hari besai) kena 22 Julai tiap taun, iya melabaka pengerami ngingatka sejarah nya diatur ngena chara besai sereta mungkur raban bansa.

Kepala Menteri serius sereta dipelabaka ulih berundingka peminta kemisi 22 Julai tiap taun nya, lalu enti aku pan endang nyukung peminta nya, ku Abdullah.

“Hari bulan nya (22 Julai) amat besai reti ba kitai kelimpah ari 16 September enggau kitai ti nyadi menua merdeka mega ingatka 31 Ogos.

“Tang aku enda nemu sekalika kaban tauka orang ti nitihka S4S nya nemu pasal sejarah nya,” ku iya.

Berebak enggau tu lebuh ditanya bekaul enggau pengawa begempuru sereta bejalai bebala mayuh ti diatur raban S4S ba padang Song Kheng Hai , iya madahka;

“Aku ninga jaku Peter John Jaban ba pengerami sepiak nyin (padang Song Kheng Hai) semina minta ungkup nya ungkup tu, tang nadai pan dalam jaku iya madahka pengawa nya dikena ngingatka sejarah.

“Aku nadai ninga dalam jaku iya sereta dalam aktiviti sida ti enggau S4S ngingatka orang ti mai merdeka ke kitai….nadai,” ku iya.

Kelimpah ari nya Menteri ba Opis Menteri Besai Nancy Shukri lebuh dirandau ba pengerami ke sama muji Kepala Menteri ti ngiring menua ti ngingatka rayat ngambika nemu beterima kasih kelimpah ari ti terus minta hak kitai.

“Aku temegah ati ngagai iya (Kepala Menteri) laban ngingatka kitai iya nya kitai orang Malaysia, taja pan kitai dalam Sarawak kitai mega dalam Malaysia lalu kitai mega patut ingat enti kitai belagu Ibu Pertiwiku, lagu Negaraku mega patut sama belagu.

“Nya penegap runding ti ditunjukka Kepala Menteri ti nyadi ketuai ngiring menua ngagai semua kitai. Nyai ketuai megai menua patut ulih nyadi chunto ngagai rayat Sarawak lalu tu patut dikemeran sereta dikemeratka kitai di Sarawak.

“Taja pan kitai nyadi orang Sarawak ti udah bejalaika mayuh pekara tang kitai patut ingat ngagai orang ti mayuh mantu kitai iya nya perintah besai,” ku iya seraya madahka nya pekara ti nyerakupka perintah besai enggau nengeri.-UB