Pengundi DUN Engkilili Patut Nerima Pemutus KM

ENGKILILI: Pengundi di sitak Kunsil Nengeri (DUN) Engkilili patut nerima enggau ati tebuka pemutus sentang chalun Barisan Nasional (BN) ke deka dibantaika Kepala Menteri Datuk Patinggi Tan Sri Adenan Satem ungkup DUN Engkilili maya Pengawa Bepilih Kunsil Nengeri (PRN) ke deka datai.

Sapit Kepala Menteri Datuk Patinggi Tan Sri Alfred Jabu Numpang madah, rayat di DUN Engkilili nerima pemutus pekara ke deka dibantaika Adenan ke mega nyadi Chairman BN, pasal sapa chalun BN ke patut bediri di DUN Engkilili ila.

Iya madah, semua serakup BN patut beserakup enggau pangan diri ngelaban penyakal maya PRN ila.

“Semua kitai patut nerima barang sapa aja chalun BN ke deka bediri di DUN Engkilili kelimpah meri mandat ngagai BN Sarawak terus merintah nengeri tu,” ku iya bejaku ngarika Adenan nutup Pesta Engkilili 2015 di Pasar Eng- ” “ kilili kemari.

Pengari rayat DUN Engkilili diatu iya nya Dr Rayong Ngipa ke ngarika Parti Rayat Sarawak (UPP) dijangka deka dichalunka baru ngetanka kerusi BN di DUN Engkilili maya PRN ila.

Nya alai, Jabu nangkan rayat ngambika anang mudah arapka jaku petenah raban penyakal ke semina nguntung politik sida aja.

“Anang mendingka jaku manis ke ditabur raban penyakal laban sida semina ngeruga penegap BN sereta atur pemansang ke diperintah perintah ditu,” ku iya.

Jabu madah, perintah BN udah ngemendarka belanja RM3.6 juta dikena ngaga tujuh buah jematan di sepanjai jalai Ulu Skrang.

Kelimpah ari nya, DUN Engkilili mega nerima agih belanja geran Projek Mit Pemansang Menua Pesisir (MRP) penyampau RM200,000.

“Ditu aku deka madah diri ngungkupka RM3.6 juta enggau RM200,000 geran MRP tambah ungkup rayat di DUN Engkilili,” ku iya.

Sama bisi datai Kaban Parlimen Lubok Antu Datuk William Nyalau Badak, ADUN Engkilili Dr Rayong, ADUN Batang Ai Malcom Mussen Lamoh, Residen Sri Aman Johnathan Lugoh enggau Pemesai Kaunsil Lubok Antu, Jack Aman Luat.-UB