Perintah tetap ngemeratka pemanah rampa menua

KUCHING: Perintah nengeri tetap ngemeratka rampa menua ti beresi sereta meruan taja pan ngembuan juluk deka nyadi sebuah nengeri mansang lebuh manggai taun 2030.

Kepala Menteri Datuk Patinggi Tan Sri Adenan Satem madah, nya dikena nentuka pemansang ekonomi menua lebih besai reti ba rayat.

“Objektif besai kami, deka seruran ngemeratka pemanah sereta pemeresi rampa menua ngambika pemansang ekonomi lebih besai reti ba rayat.

“Kami enda sengapa ngeruga pemanah rampa menua sereta deka ngemeran pemanah nya seraya nyuluk nyapai nengeri mansang manggai taun 2030.

“Di Sarawak ditu, kami bejalaika beberapa inisiatif kena nyaga sereta ngetanka pemanah rampa menua. Keterubah mangku pengawa, aku mutus deka ngetuka pengawa berimba kampung nadai beradat,” ku iya.

Adenan mansutka pekara nya dalam jaku iya ti dibacha Sapit Kepala Menteri Datuk Patinggi Tan Sri Alfred Jabu Numpang, ti ngarika iya bejadika International Environmental Health Conference (IEHC) 2015 ti diatur Health Inspector Union of Sarawak Health Department ba sebengkah hotel ditu, kemari.

“Merimba kayu kampung enggau nadai atur ke menuku ukai semina ngerugika asil menua tang ngeruga pemanah rampa menua.

“Kami udah ngepunka atur nagang pengawa berimba kampung enggau enda beradat, pia mega aku ngaku atur nya enda ulih nyeliah semua pengawa enda beradat nya laban rampa menua Sarawak kelalu besai,” ku iya.

Bejaku baru iya madah, perintah nengeri mega udah ngetuka pengawa muka kebun bedandang besai kelapa sawit kena nyaga sereta ngetanka pemanah rampa menua.

Iya madah, sekeda kandang endur ti besai di nengeri tu deka digaga nyadi ‘Totally Protected Area’ (TPA) lalu dijadika Taman Negara enggau Kampung Galau.

“Kami meransang raban saintis rampa menua bejalaika pengawa pemansik ba kampung kitai sereta kitai mega meri peluang ngagai gerempung ukai dikuasa perintah (NGO) ke deka mantu kitai nyaga enggau ngentanka pemanah rampa menua.

“Ngarapka nengah aum tu semua kitai ulih belajar sereta bekunsi dua pekara ti amat beguna iya nya rampa menua enggau pengerai,” ku iya.

Berebak enggau tu iya madah, mengeri Kuching ti diuan urung 600,000 iku mensia udah disikap ngena sistem pemeresi uras ke sistematik sereta moden kenyau ari taun 2000.

Palan pemeresi ke ngelumu semua uras sereta pengamah ari ai nengah paip baruh tanah mega bisi disediaka ti begunaka ungkus belanja RM2.5 billion, ku iya.

“Palan tu endur meresi semua utai kamah nyadi ai beresi sebedau dipansut ngagai rampa menua.

“Pengawa renggat keterubah ti beungkus RM530 million mungkur penyauh 65 KM ke nguntungka urung 67,000 peranak ba kandang mengeri,” ku iya.

Aum besai ti berambaika leka jaku ‘Threats to Health: Uncovering Issues, Challenges and Prevention’ dua hari nya, ke dipenyadika kemari sama bisi digulu Kepala Direktor Opis Pengerai Malaysia Datuk Dr. Noor Hisham Abdullah, Menteri Muda Pengerai Mensia Mayuh Datuk Dr. Jerip Susil, Direktor Opis Pengerai Nengeri Sarawak Datu Dr. Zulkifli Jantan enggau ke bukai sereta urung 600 iku deligit.-UB