BN mai politik pemansang, ukai politik mechahka rayat

SRI AMAN: Menteri Muda Pemansang Menua Pesisir enggau Pengawa Berumah Datuk Francis Harden Hollis madah, politik ke dibai perintah Barisan Nasional (BN) endang politik dikena ngemansangka rayat lalu ukai politik mechahka rayat.

Kenu ku iya, perintah BN seruran mantaika polisi pemansang ke ulih mai pengelantang enggau penyenang ngagai semua enda ngira bansa enggau jalai pengarap lalu ukai polisi mechahka rayat.

“Polisi kitai dalam perintah BN semina seiti aja iya nya deka mai pemansang ngagai rayat, BN mega seruran mendingka sebana rayat sereta naka ulih mantu sida mutarka penanggul ke bisi nekul.

“Kitai dalam perintah BN ukai baka sida penyakal ke semina landik bejaku puang sereta nabur semaya ba mayuh endur, tang kitai dalam BN seruran ngamatka semua semaya ngagai rayat,” ku iya.

Kaban Kunsil Nengeri (ADUN) Simanggang tu madah munyi nya rambau Program Walkabout ke diatur Opis Pengintu Pengelantang Raban Bansa (KEMAS) di Rumah Tinggi Usop, Kampung Tekalong, Jalai Paip, kemari.

Kenu ku iya, rayat patut nemu sida agi tubah begunaka pemansang baka jalai raya, bekal ai beresi, kuasa kara enggau mayuh agi ke bukai ari perintah BN.

“Semua pemansang ke diasaika rayat sehari tu endang datai ari perintah BN lalu ukai ari raban penyakal.

“Raban penyakal semina ulih nabur semaya puang sida dikena minta ngulihka sukung ari rayat,” ku iya.

Tambah mega, baka ke ditemu semua kitai, raban penyakal tu semina ayan maya semak pengawa bepilih besai aja tang sida nadai agi dipeda pengudah abis pengawa bepilih. Sida tu semina ulih disemaka baka ‘Kulat Tumbuh Pengudah Ujan’.

“Nyema nyengala beamat-amat deka gawa ke rayat nama kebuah maya ukai pengawa bepilih besai sida nadai dipeda gawa ke rayat?

“Perintah BN patut diambika chunto nyadi perintah ke pemadu manah laban sida seruran bejalaika pengawa ungkup rayat sepanjai maya,” ku iya.

Nya alai, ku iya BN seruran ngamatka semaya sida sereta gawa bebendar ngintu pengelantang rayat sepanjai maya,” ku iya.

Sama bisi datai Supervisor Kanan KEMAS Sri Aman, Fatimah Tahir, Mandal opis KEMAS Sri Aman, Kelvin Lambai, Ketuai Komiti Indu SUPP Simanggang, Ling Siew Hung sereta Penyanding Penemu Nembiak SUPP Simanggang, Patrick Micheal Dian.

Ba pengawa nya, Harden bisi nyuaka geran agih belanja ari perintah RM3,000 ungkup Biro Indu Rumah Tinggi dikena sida ngatur program.-UB