Nadai orang gawa perintah dibuai, diputung gaji

KUCHING: Sapit Sekretari Perintah Nengeri Datu Ose Murang madah,semua projek ti udah dikemendar digaga di nengeri tu tetap deka dipejalai taja pan ba maya ekonomi ti kusut diatu.

Nambahka nya,iya mega madahka nadai pengereja pengawa perintah deka dibuai kereja tauka diputung gaji,ke alai Sarawak diatu bisi urung 20,000 iku pengereja pengawa perintah.

“Nadai penetap madahka orang gawa deka dibuai kereja di Sarawak,kitai ditu ngembuan mayuh bengkah pun penatai ekonomi.

“Sarawak numbuhka sekeda palan pengatur pengawa ba taun ke udah ke alai diatu kitai udah bisi seiti agi pelilih menua baru,semilan pelilih mit sereta 4 sab-pelilih mit. Nya kebuah kitai begunaka mayuh orang gawa,”ku iya.

Iya mansutka jaku tu ba aum pengarang berita pengudah bejadi Licha Kongres Kesatuan Pekerja-Pekerja Dalam Perkhidmatan Awam (Cuepacs) ditu, kemari.

Meretika singkang menua ti majak mansang, Ose minta orang gawa nyendia servis ke pemadu manah ngambi tau nyapai juluk ‘Servis Tikas Dunya’ ti ditetapka Perintah Nengeri manggai taun 2020.

“Ba maya tusah enggau lantang, sigi bisi pemar ti datai nguji. Chara kitai nempuh semua nya bepanggai ba pengeliat ati, dedikasyen sereta runding ke positif ke alai gaya ekonomi ti enda manah suah nyadi dalam timpuh 10 taun,’ku iya.

Iya nambah, orang gawa perintah deka bela besaup napi pemar lalu nemu chara dikena mutarka tetiap isu asil ari pangka ekonomi.

Bejaku ngagai penyereta licha, Ose madah teknologi ke dikemisi diatu patut ulih ngangkatka servis ti disedia lalu patut enda ngelabuhka penengkeman servis sida.

“Teknologi patut mai pemaik ngagai produktiviti enggau servis. Tang enti dikena nengah jalai ke salah, tau endar mai pengerusak.

“Tikas penengkeman servis tetiap iku orang gawa mega patut ditiki lalu ukai semina datai pukul 8 pulai pukul 5,”ku iya nandu.

Bela datai Presiden Cuepacs Datu Azih Muda.-Borneo Post