UPP enda besiping sukung enggau chalun SUPP maya PRN ila: Wong

KUCHING: Parti Rakyat Bersatu (UPP) deka meri sukung penuh ngagai chalun Parti Rakyat Bersatu Sarawak (SUPP) ba pengawa bepilih nengeri (PRN) ke deka datai.

Presiden UPP, Dato Sri Wong soon Koh madah, parti deka enggau naka pemendar meri sukung ngagai semua chalon SUPP.

“Kami (UPP) meri sukung penuh dikena mantu chalun (ari SUPP) ba beberapa sitak ke alai SUPP bisi bediri minta pilih lalu nya semaya kami,” ku iya lebuh dikerandau pengarang berita.

Iya ti mega Menteri Kandang Menua enggau PemansangMensia Mayuh dulu ari nya bejadika pengawa ngari rerambak mayau ba Jalai Padungan ditu, ke sama digulu Datuk Bandar Majlis Bandaraya Kuching Selatan (MBKS) Dato James Chan enggau Ketuai Sekretariat Gabungan Bandaraya Sihat, Keiko Nakamura.

Ku Wong, UPP udah madah ngagai Kepala Menteri Datuk Patinggi Tan Sri Adenan Satem ke alai parti nya deka gawa bebendar ke Barisan Nasional (BN) ba PRN ti deka datai.

Iya ti mega Menteri Pekara Wang Kedua madah, parti nya nyerahka ngagai Adenan ti mega Chairman BN nengeri ngaga pemutus ba sapa bagi chalun.

“Kami nyerah ngagai pengelandik Adenan pasal rintai nama chalun kami tang kami ngarapka kami diberi peluang bepelasarka ulih menang (chalun kami),” ku iya.

Iya madah, parti nya udah ngenataika ngagai Adenan rintai sitak ke dikerindu tauka dikearapka parti nya ba PRN ke deka datai.

Taja pia, iya enggai madahka penyampau sitak tang inya nyengkaum sitak ti benung diarika kaban ke diatu ke enggau UPP.

Sitak Opar diarika Ranum Mina, Engkilili (Johnichal Rayong), Mambong (Bengoh) (Datuk Dr. Jerip Susil enggau Bawang Assan diarika Wong.

Ngenang pasal ripot surat kabar kena 22 Januari tu tadi, ti ngambi jaku Sapit Presiden SUPP Datuk Seri Richard Riot Jaem ti udah diberi Kepala menteri tanggungpengawa ngelala bagi chalun ti ulih menang bediri ba sitak majoriti Dayak, Wong madahka diri semina nemu pekara nya ari surat kabar aja.

“Aku enda nemu pasal nya nyentuk maya aku macha surat kabar tang nyema iya (Riot) diberi tanggungpengawa nya iya patut ngereja pengawa nya,” ku Wong.

Riot ti mega Menteri Pengatur Pengereja Pengawa madah, iya diberi Adenan tanggungpengawa ngelala bagi chalun ti bisi jalai menang bepilih ba Opar, Mambong, Simanggang enggau Engkilili lalu sitak majoriti Dayak bukai ari 11 sitak ti diberi ngagai SUPP.

Kelimpah ari nya Wong arap bendar Sarawak ulih ngerambai maju agi ari baruh iring Adenan.

‘Iya ngarapka Taun Kera’ tu deka mai pengelantang ti lebih besai ngagai rayat Sarawak.-BP