Semua pengerusak ketegal ampuh bah di SK Ulu Budu deka dikemanah jampat

SARATOK: Pengerusak ke nyadi di SK Ulu Budu ketegal ampuh bah apin lama udah, deka dikemanah jampat, pia ku Menteri Pemansang Rama, Tan Sri William Mawan Ikom.

Mawan ti mega MP Saratok ngenuku pekara tu lebuh ngabas endur nya sereta beratika pengerusak ti nyadi ba sekula enggau ngelingi kena Hari Minggu siti nyin tadi.

Ku Mawan, andau ke nyambung rumah panjai enggau sekula nya udah runtuh ketegal arus ampuh bah, deka digaga baru.

Ke bendar, andau nya udah kelalu tuai sereta patut diganti baru, ku Mawan seraya madahka iya udah ngungkup belanja RM200,000 ke tuju nya.

“ Kenyau andau nya rusak ketegal ampuh bah apin lama udah,aku arapka kami ulih ngaga andau ke baru enggau naka pengelengkas laban andau nya beguna amat ke nembiak sekula nya,” ku iya.

Kelimpah meri ungkup belanja dikena ngaga andau baru, Mawan mega bisi ngungkupka belanja RM100,000 dikena ngelempung tating sida ti tasah ketegal ampuh bah nya nyengkaum SK Ulu Budu.

Kena nentuka sesi besekula enda tejanggal pengudah kemisi pandak, Mawan minta peranak menua nya beripai ngemanah sebagi jalai ke nuju ngagai sekula nya.

Lebuh ke ngabas palan nya, Mawan disempulang Pemantu Pemesai Pengatur Pengawa Opis Pelilih Mit Pakan, SAO Dana Ungki enggau Pemesai Pengerembai Kaul Opis Pengelantang Pendiau (Jasa) Parlimen Julau, Sylvester Embuas.-BP