22 Julai Hari Kemisi Nengeri Sarawak - CM

Kepala Menteri Datuk Patinggi Tan Sri Adenan Satem udah madah lalu netapka 22 Julai ninting taun nyadi hari kemisi ba nengeri Sarawak. 

Ku ia, tu iya nya seiti ari chara kena perintah ngingat enggau ngenang jasa Staring tauka raban ketuai rebak dulu kelia.

“Diatu aku deka madah lalu netapka 22 Julai nyadi hari kemisi ngagai rayat nengeri Sarawak.

“Tu kena kitai ngingat sereta ngenangka raban ketuai ke dulu kelia,” ku iya.

Ia mansutka pekara tu lebuh bejadika 'Grand Finale, Sejiwa Senada 2016' iya nya renggat ke-10 ti diatur ba Metro City Matang. Pengerami tu mega nerima penatai bini iya, Datin Patinggi Datuk Jamilah Anu, Timbalan Ketua Menteri Datuk Patinggi Tan Sri Alfred Jabu Numpang enggau Menteri Pelancongan Datuk Amar Abang Johari Tun Abang Openg.

Sebedau tu, Adenan madah iya deka berandau enggau Menteri Besai Datuk Seri Najib minta 22 Julai diaku nyadi hari dikena ngerami Hari Kemerdekaan Sarawak sereta lalu nyadi hari kemisi nengeri.

Haribulan 22 Julai iya nya hari Sarawak Merdeka ari diperintah British.

Kelimpah ari nya, Adenan minta rayat Sarawak sama besaup maya Pengawa Bepilih Nengeri Sarawak Ke-11 (PRN11) kelebih agi maya berunding pekara betul tauka enda.


“Ulih nya, aku minta semua rayat nengeri tu meri peluang ngagai aku ngiring nengeri tu naka dalam lima taun agi.

“Beri aku mandat besai ngambika aku ulih ngarika kitai betemu enggau orang di Kuala Lumpur. Tu ukai ketegal aku gila pangkat mabuk pangkat tang ngambika kitai sama ngemansangka nengeri tu," ku ia.

Iya madah mayuh agi pekara tauka polisi perintah deka dipejalaika kelimpah ari 53 polisi ke udah digaga iya dalam timpuh dua taun nyadi Kepala Menteri.

“Udah lima taun ila aku enggai agi megai pengawa tu, maya nya umur aku udah tuai iya nya 77 taun.

“Aram kitai sama besaup tauka beserakup runding negika Sarawak dalam Malaysia,” ku iya mega.

Entara 53 polisi ke digaga iya nyengkaum enda ngemendarka Bumiputera Sarawak disebut nyadi ‘Lain-Lain’ ba pom rasmi perintah, bansa China ukai orang datai, nginsil tol, nurunka chukai pintu enggau mayuh agi polisi bukai ti ngemeratka pengelantang rayat enggau nengeri tu.


Nyerumba pengerami nya kemari, Adenan diberi basa nyuaka surat chiri ngagai ketuai raban bansa di Bagi Menua Kuching, nyuaka Warta Rizab Komunal Bumiputera Seksyen 6 Kanun Tanah Negeri di Bagi Menua Kuching sereta nyerahka pemeri Tanggungpengawa Rama Korporat Petronas ngagai Gerempung Volenter Pengasih di kandang menua Kuching.

#PRNSARAWAK