SPR Ngarap Sarawak Ngenanka Rikod Proses PRN Ke Pemadu Manah

Sarawak megai rikod ke pemadu manah di Malaysia sekumbang timpuh engawa beppilih dipejalai ngelama tu.

Komisyen Pengawa Bepilih (SPR) ngarapka proses Pengawa Bepilih Nengeri Ke-11 (PRN11) dipejalaika enggau lanchar sereta nadai sebarang penusah.

Nitihka Chairman SPR Datuk Seri Mohd Hashim Abdullah, nengeri tu megai rikod ke pemadu manah di Malaysia rambau pengawa bepilih dipejalaika. Iya mega madah Pengawa Bepilih Mit (PRK) Balingian nyadi seiti chunto proses bepilih ke lanchar sereta likun.

“Naka ke diatu, nadai udah manah agi ari rikod Sarawak. Baka PRK Balingian ti udah bejalai manah, nadai nganu pangan diri lalu aku ngarapka Sarawak ulih ngenanka rikod tu,” ku iya ba seiti aum pengarang berita di Begunan Sultan Iskandar, Jalai Simpang Tiga ditu.

Hashim ngelalau semua ke bekaul ba pengawa bepilih meri kerejasama lalu nitihka atur ke udah ditetap kelebih agi maya hari ngantung nama chalun ke berengkah jam 9 pagi nyentuk 10 pagi. Keretas ngantung nama chalun ke udah diisi enggau betul tau disua chalun, penchadang enggau penyukung ngagai pemesai pengatur tauka seiku ari seduai tauka seiku ari sida tiga.

Iya mega ngelalau semua sida patut nitihka penetap Seksyen 24A Akta Kesalahan Pilihan Raya 1954 (Akta 5) maya Hari Ngantung Nama Chalun. Seksyen nya netapka pekara ke enda patut dikereja baka, penyukung chalun enda tau nganti tauka bediri 50 meter ari adan palan ngantung nama chalun.

Enti ditemu ngelanggar penetap, tau diukum jil pengelama timpuh enda ngelui setaun tauka ukum mata duit RM3,000 tauka kededua.

“Aku sekali agi ngelalau semua bebasaka atur enggau undang-undang ke ditetap iya nya semina tiga iku, chalun, penchadang enggau penyukung aja dikemendar tama dalam palan ngantung nama.

“Sida ke datai bebala mayuh ngiring chalun dilalau enda ngerempuh adan tang nganti di luar pagar ngambika enda nanggul kereja raban pengatur pengawa,” ku iya seraya madahka rintai nama chalun ti bediri deka dibantai pengudah timpuh ngantung nama ditutup jam 10 pagi.

Ku iya nambah, chalun ulih mayar deposit pengawa bepilih penyampau RM5,000 nengah chara bank draft tauka mata duit sereta tau mayar sebedau Hari Ngantung Nama tang meseti mai resit bayar ba hari nya.

Iya mega madah, chalun ke bediri ngarika parti politik enggau simbol parti ke direjista ba SPR dilalau mai surat pemendar ari seiku pemesai parti ke ngembuan kuasa meri pemendar simbol dikena.

Ngenang sentang timpuh kimpin, iya madahka kimpin semina berengkah pengudah Pemesai Pengatur netapka 25 April 2016, lalu kimpin patut diketu kena jam 12 tengah malam 6 Mei.

“Ba atur matau pengawa bekimpin, SPR numbuhka Tim Penerit Kimpin Pengawa Bepelilih (PP-KPR) seraris enggau Seksyen 27B Akta 5,” ku iya.

Kelimpah ari nya, dikena nentu pengawa bepilih dipejalai enggau lanchar, Hashim madahka SPR deka ngaga kerejasama enggau polis sereta ijinsi ke bekaul.

“Kitai ngaga kerejasama enggau polis dikena nentuka nadai sebarang penusah nyadi,” ku iya.

Iya mega madah, naka jam 5 lemai kena Hari Lima (22 April), 971 iti pom ngantung nama udah dijual ke alai 124 dijual di zon Kuching, Sri Aman (54), Sibu (178), Miri (172) enggau opis SPR Negeri (443). Penyampau 1,146 iti pas ungkup raban media mega udah dikeluar ungkup PRN11, tandu iya.

#PRNSARAWAK

Sumber ; Borneo Post Online