Perintah Nengeri Numbuhka ‘Crocodile Free Zone’

Perintah nengeri nengah Opis Kampung Sarawak udah numbuhka ‘Crocodile Free Zone’ ti nyadi siti ari chara ngurangka penusah tauka konflik antara baya enggau mensia.

Menteri Pengatur Pemansang Pengeraja Asal enggau Rampa Menua II Datuk Amar Awang Tengah Ali Hassan madah, penusah tu suah nyadi ba sekeda endur ba nengeri tu iya ke besemak enggau sungai.

“Nya alai, dikena ngurangka penusah tu sekeda atur udah digaga nyengkaum numbuhka ‘Crocodile Free Zone’. Ukai semina nya aja, chara baka tu mega ulih nejuka baya nyadi sebengkah ari produk tauka program eko-dagang temuai,” pia ku iya maya Pengerami Bejadi Ngintu Hari Jelu Siga Sedunya Renggat Nengeri Sarawak ba Taman Rimba, Bukit Lima kena 21 April tu tadi.

Teks jaku iya tu dibacha Menteri Muda ba Opis Kepala Menteri ti mega Menteri Muda Rampa Menua Datu Len Talif Salleh. Bela bisi datai maya tu iya nya Direkter Kampung Sarawak Sapuan Ahmad. Awang Tengah mega madah, Gerempung Opis Kampung Sarawak (SFC) deka chakah agi ngatur kimpin ti bekaul enggau pekara nambahka penemu mensia mayuh sentang rampa menua tu bela diuan baya.

Kelimpah ari nya, ku iya, perintah udah nyiri bala tuai raban bansa nyadi Renger Kehormat Hidupan Liar ngambika nyadi mata enggau pending perintah nentuka pengelikun rampa menua enggau jelu siga ba menua diri empu.

“Gerempung ukai dikuasa perintah (NGO) bela megai tanggung pengawa ke besai lebih agi nyaup perintah ngembing mensia mayuh ngambika mansang seririh enggau tuju tauka polisi ke diatur perintah. Kitai mega ngelaluka NGO ti ngembuan tuju ke sebaka enggau perintah nengeri nempa kaul tauka kerejasama begulai enggau ijinsi perintah tauka raban mensia mayuh dikena ngemujurka agi tuju tu,” ku iya madahka baru.

Semua tu ku iya deka ngembing rebak baru nemu jelu siga ukai nanggul pemansang tang seiti ari pengeraja ti patut dikemegah sereta dijaga enggau manah. Berindik ari pekara tu, Awang Tengah madah perintah deka nambahka agi penyampau Sanktuari Jelu Siga.

Tang ku iya, mensia mayuh ke diau besemak enggau palan nya patut nerima sereta nyukung pengawa perintah nya. Kelimpah ari nya, Awang Tengah mantaika pengirau ati ketegal pengawa ngasu enggau nyual belalai jelu siga majak nyadi maya hari tu.

“Kitai nemu, jelu ke punas bela ketegal ari ubah gaya hari, rampa menua ke enda manah agi, kampung dirumpang enggau ketegal ulah mensia empu. Pemansang enda ulih diseliahka tang meseti disebela enggau pengeransing nyaga pengelikun rampa menua enggau jelu ke diau dia,” pia ku iya madah.

Berebak enggau tu Len dipebasa nyuaka 23 surat nyiri pengawa Renger Kehormat Hidupan Liar enggau ngagai Komiti Khas Taman Rizab Semulajadi Bukit Lima Sibu enggau nyuaka perais ngagai pemekit ke bulih lumur ba Pekit Ngelinsu Nembiak Sekula.

#PRNSARAWAK