Welson Enggau Indai Ia Nerima Duit Pelanja Ari Dua Kompeni

Seiku atlet nyemerai peranak Sarawak ke deka ngarika Malaysia ba Lumba  Olimpik 2016, Welson Sim kemari nerima duit pelanja ari kompeni dua buah kompeni iya nya i.Star Ideas Factory Sdn Bhd enggau Revor Bedding.

Kenu ku Direktor Pengatur Pengawa i.Star Ideas Factory Sdn Bhd Dato’ Adriana Law, duit pelanja nya pemeri sida dikena meli tiket bilun, bayar palan diau enggau belanja bukai ungkup indai Welson ke bisi ati deka nguluka anak iya ngagai Rio de Janeiro, Brazil ba lumba besai ke deka diatur bulan Ogos tu ila.

“Kami nemu pengeran seiku indai ke deka meda anak diri betapat ba luma besai nya, tambah mega semina iya aja atlet lumba nyemerai gaya bibas ke ngarika menua kitai, lalu iya endang anak Sarawak.

“Nya alai, kami asaika dikangau meri bantu mimit ba sukut belanja indai iya ngambika ulih nguluka iya ngagai Brazil (Rio de Janeiro) sereta meri sukung sereta ulih meransang anak iya semak agi sereta ngarapka ulih mai midul emas ungkup menua kitai,” ku iya.

Iya madah munyi nya ba sebengkah aum media sebedau nyuaka replika chek ngagai Welson enggau indai iya, Lee Ngiat Kim ke bela ngulu pengawa nya.

Nangkan nya, Direktor Pengatur Pengawa Revor Bedding Mark Mah, madah pemeri lebih ngagai pengawa kompeni dikena mantu rayat ke begunaka bantu.

“Kelimpah nya, kami mega ngarapka orang bukai ulih neladan pengeransing Welson dikena ngemansangka diri dalam bidang lumba nyentuk ke iya ulih dipilih besemekih ba renggat tinggi ngarika menua ba peringkat dunya,” ku iya.

Welson, 19 maya dirandau nyadaka penyinu ati enggau pemeri ke udah disua ngagai seduai iya meindai.

Kenu ku iya, pengawa nyikap diri ke Brazil diatu benung dipejalai nyengkaum meli tiket bilun ke mudah ungkup indai iya sereta tiket tama ke stadium, palan  endur iya belumba ila.

“Aku chukup beterima kasih ngagai pemeri tu, lalu enggau penatai indai aku maya lumba nya ila, ngarapka iya ulih meri peransang ke lebih ngagai aku awakka bulih midul emas.

“Utai dikearapka aku iya nya ulih mintas rikod pemadu manah diri empu iya nya  1 minit 47 saat ba lumba nyemerai gaya bibas 200 meter enggau 3 minit 50 saat ba 400 meter, udah nya nempa rikod baru sereta masuk renggat semi final,” ku iya enggau penuh pengarap.

Welson seiku nembiak ke kala belajar ba Sekula Sekondari (SMK) Batu Lintang ari Pom 1 nyentuk 3 lalu udah nya pindah ngagai Sekula Lumba Bukit Jalil (SSBJ) ba Pom 4 enggau 5.

Iya bepun chakah ba lumba nyemerai bepun ari umur 10 taun lalu belabuh nyererat pekit lumba nya maya umur 11 taun ke ngujungka diatu datai ba renggat dunya.

Ba pengawa nya, i.Star Ideas Factory Sdn Bhd enggau Revor Bedding bela nyuaka pemeri RM10,000 ngagai Welson enggau indai iya.

Sama bisi datai Direktor i.Star Ideas Factory Sdn Bhd Jason Yap.

#PRNSARAWAK