Tambahka Pengelandik Bejaku English

Jaku English muntang dipelajar enti ransing macha sereta semampai dikena maya ke berandau enggau pangan diri.

Ex-Kaban Kunsil Nengeri (ADUN) Tamin Datuk Joseph Mauh Ikeh madah, rebak diatu anang enggai nambahka pengelandik bejaku English ketegal jaku tu nyadi jaku antarabansa.

“Ukai semina bala nembiak tang semua tikas umur meseti landik bejaku English,” pia ku iya madah ba 'Malam Penghargaan Aktiviti Komuniti' ke diatur ba Kolej Kejururawatan Sibu ditu, empai lama tu tadi.

Sama bela bisi datai maya tu iya nya Direktor Kolej Kejururawatan Sibu Lee Na enggau Presiden Raban Nembiak Selangau Henry Kanyan.

Kelimpah ari nya, Mauh mega ngarapka bala indu misi ulih nemu lebih ari seiti bansa jaku dikena ngumuntangka agi pengawa sida begulai enggau orang sakit ari pupu bansa.

“Pengawa nyadi indu misi iya nya pengawa ti manah.Tang lebih agi manah enti kita bisi pengelebih ulih bejaku bansa bukai,” ku iya iya madahka baru.

Nambahka nya, iya mega ngelalau mensia mayuh ngambika silik nemu nama bagi ubat ke diempa sida.Ku iya, penemu ke silik nya beguna dikena nyeliahka penusah bukai tau nyadi.

“Pia mega, ambi tauka empa ubat kita nitihka atur ke dipadah lutur,” pia ku iya ngelalau

#PRNSARAWAK

Sumber ; Borneo Post Online