Penembu Jematan Kpg Sadong/Buloh tinggal 4%

SADONG JAYA: Jematan Kampung Sadong/Buloh, ke ngembuan 1.48km pemanjai di sitak Samarahan diatu semina tinggal empat peratus (%) bedau tembu, lalu dipelaba tembu sereta ulih ditengah mensia mayuh dalam bulan Oktober tu.

Menteri di Opis Menteri Besai Nancy Shukri madahka jematan nya diatu nyau deka tembu, lalu naka tu penembu jematan nya urung 98.52% udah digaga magang sereta dijangka deka belabuh dibuka ngagai penguna ba pun bulan OKtober tu.

“Penembu jematan nya diatu nitihka maya ke patut tang diatu udah masuk bulan September, nyangka tumu agi iya tembu ari perambu.

“Diatu, jematan nya bedau ulih dikena mensia mayuh laban agi bisi perengka guna ke patut dipasang,” ku Nancy.

Iya madah munyi nya maya ngabas penembu jematan nya, kelimpah bejadika kelai ngaduka ‘girder spans’ ba bagi jematan ke penudi iya endar di Jematan Kpg Sadong/Buloh semak ditu, kemari.

Nancy nusui pengingat maya iya terubah minta Perintah Besai ngaga jematan ungkup rayat diak. Maya nya iya enggau ADUN Sadong Jaya Ir Aidel Lariwoo minta sebuah jematan ungkup sitak Batang Sadong, maya Aidel baru deka bediri minta pilih nyadi ADUN ke Sadong Jaya dalam taun 2011. Sida empu berandau enggau Menteri Besai.

“Dalam kandang sejam peminta kami mujur disaut Menteri Besai ke ngemendarka projek nya, lalu berindik ari nya kami nyendiaka semua dokumen minta projek nya digaga,” ku iya.

Nancy ti mega nyadi Kaban Parlimen (MP) Batang Sadong madahka taun nangkan nya (2012) projek nya belabuh digaga lalu dijangka tembu dalam taun 2016.

“Utai ke disemaya Perintah Besai udah dipeda kitai sehari tu, tu mandangka perintah ngamatka semaya sida iya mantu mensia mayuh di genturung pendiau sitak parlimen Batang Sadong,” ku iya.

Pemujur jematan tu mega ulih napi penanggul feri ke enda konsisten, kelebih agi ungkup peranak ke endang mendam di Simunjan, Sebuyau, Ladong sigi bepanggai ba feri ninting hari, enti sida iya deka mindah ke bukai.

“Maya nya sebuah feri aja meh dikena mensia mayuh kundang kasang di sitak tu, ketegal peminta rayat ke deka ngena feri nyemerai ke seberai ari Sadong ngagai Simun jan, sereta ari Ladong ngagai Simunjan tauka Sadong, bala mayuh lalu ditambah agi enggau penanggul feri ke selalu rusak, ngujungka mensia mayuh suah ringat sereta mantaika sebana.

“Pemisi jematan tu ila, iya deka nyadi utai ke nyata lalu ulih ditengah mensia mayuh,” ku iya.

Ba jaku Aidel, jematan ke digaga nengah Langgur Pemansang Malaysia Lumpar ke-10, diatu udah digaga dalam RMK ke-11 nyadi seiti pekara ke ngasuh rayat temegah ati.

“Aku empu berasai temegah ati laban iya nyadi jematan ke pengabis panjai di menua tu, lalu ukai semina nya aja, tang ukai semina di menua Sarawak tu aja, tang ke pengbis ke panjai di Pulau Borneo.

“Komuniti ti diau di Sadong Jaya, Asajaya, Sebuyau, Simunjan, Gedong, meri terima kasih ngagai Menteri Besai laban udah ngemendarka jematan pengabis iya panjai di Sarawak dalam taun 2011 digaga sereta di keamatka,” ku iya lalu nandu baru, meri terima kasih iya ngaga ejensi Perintah baka Opis Kereja ke komited endar ngaga projek tu datai ke iya tembu tumu agi ari perambu.

Sama bisi enggau ngulu pengawa nya kemari, Direktor Opis Kereja Sarawak, Ir. Zuraimi Sabki madah ni maya jematan nya ulih dikena ulih mensia mayuh dalam bulan Oktober tu bedau ditetapka agi tang dijangka antara pun bulan Oktober tauka tengan bulan OKtober.

“Ke batang, iya bedau ulih ditengah mensia mayuh, lalu nyambung perengka guna bukai niti jematan nya.

Nya alai, kami lalu bendar ngemendarka mensia mayuh nengah jematan nya laban beratika pengelikun sida iya.

Jematan ke pengabis panjai meraka sungaij tu ke pengabis iya panjai di Malaysia lalu iya mega nyengkaum pemansang tu sebagi ari penyambung ke sama ulih ditengah ngagai Simunjan, Sebuyau, enggau Gedong.

“Enti penguna nengah ngelawa Sibu, ulih ngurangka pejalai sida iya tiga kali lipat, lalu tau dikena penguna jalai alun ngagai Batang Lupar, Batang Igan tauka Batang Paloh,” ku iya, lalu nandu taja pan udah bisi jematan nya, feri naka kediatu agi dikemendarka mai penumpang dalam kandang dua tiga bulan tu,

Jematan Kpg Sadong/Buloh ke digaga KACC Construction Sdn Bhd lalu digaga dalam kandang 48 bulan nya tembu sereta dalam pemanjai 1.48km ngembuan dua iti lurung beungkus RM211.385 juta.-BP