Penembu Jematan Btg Sadong meri ‘1001’ berekat ngagai mensia mayuh

SADONG JAYA: Jematan Batang Sadong ke udah dipenyadika Menteri Besai Datuk Seri Najib Tun Razak kemari mandang seiti manifestasi perintah ke beratika rayat Malaysia di Sarawak tetap dikeibuhka lebih agi ungkup rayat ke diau ba kandang pesisir pantai dikena ngubah pemansang landskap Sarawak.

Najib maya bejadika jemtan tu madah, iya ngembuan visi ke Tanah Sarawak tu, iya nya dalam kandang berapa taun tu ila, Sarawak deka ngembuan dua (dua batang jalai besai), iya nya Jalai Besai Pan Borneo ke benung digaga diatu.

“Jalai Besai Pan Borneo nyadi jalai penyambung ngagai menua pesisir, nya alai jalai pesisir pantai nyadi penyambung jalai ngagai menua pesisir.

“Komuniti ke diau di pesisir pantai mega begunaka penyambung jalai ke ulih disediaka dalam timpuh ke ditetapka,” ku terang Najib maya bejadika Jematan Batang Sadong ditu, kemari.

Kelimpah ari projek baru tu (Jematan Batang Sadong), bisi mega projek ke benung digaga tauka udah dikemendarka, iya nya baka Jematan Batang Samarahan ti beungkus urung RM112 juta lalu dipelaba tembu pengabis tumu iya nya pun taun 2018, ku iya.

“Lalu bisi mega projek ke udah dikemendar (nengah aum) lalu benung dalam proses (pra-dikemujur), iya nya Jematan Batang Igan ke dipelabaka deka digaga enggau ungkus RM300 juta enggau Jematan Batang Rambungan ke deka digaga nengah ungkus RM130 juta.

“Penembu jematan tu ila, deka nyendiaka penyambung jalai pesisir pantai ngagai rayat di menua tu.

“Baka Jematan Samarahan diatu benung digaga, udah digaga 52%, lalu enti Jematan Samarahan nya temb, pejalai ngagai Kota Smaarahan ulih dipuntang agi ari 40 minit ngagai 15 minit aja,” ku iya.

Najib nandu, perintah nemu, antara jematan ke bedau digaga enggau penyambung jalai pesisir tebing pantai baka Jematan Batang Saribas, Jematan Muara Lassa enggau Jematan Batang Paloh patut digaga dikena nyendiaka penyambung jalai pesisir pantai.

Bekait enggau penembu Jematan Batang Sadong ku iya, meri ‘1,001’ (mayuh) macham berekat ngagai mensia mayuh ke diau di sitak nya, sereta ngagai mensia mayuh ke nengah jematan nya baik nya ari Kota Samarahan ngagai Kuching.

“Pemisi jematan tu mungkur mayuh pekara nyengkaum pengelikun ke dijamin kelimpah ari sosio-ekonomi enti udah semak enggau pengeluar sereta makit, ulih ngangkatka penatai pemisi mensia mayuh ke diau di sitak tu,” ku iya.

Jematan Batang Sadong nya tembu, tumu ari timpuh ke patut, iya nya dua minggu tumu agi ari bajet, lalu enti nitih suba, ungkus bajet ke deka dikena ngaga jematan nya, dalam RM243 juta, iya nya penyampau ke dipelabaka ulih Opis Menteri Kereja tang udah tembu jematan nya digaga, semina RM231 juta aja (Belaluh RM12 juta), ku iya.

Sebedau nya, dalam teks jaku Kepala Menteri ti dibacha sapit iya, Datuk Amar Abang Johari Tun Openg madah, menua Sarawak begunaka ungkup ke besai dikena nyendiaka infrastruktur ngagai rayat laban nengeri tu chukup besai diumba gaya geografi mar.

“Perintah Nengeri seruran ngelaluka pengawa Perintah Besai meri ungkup ke besai agi kelebih agi dalam pekara bekaul enggau pemansang infrastrutur di Sarawak dikena ngungkak pengerembai ekonomi.

“Kitai sigi ngarapka pengawa begulai Sarawak enggau Perintah Besai terus tegap ngambika pemansang ditu sebaka enggau Semenanjung,” ku iya.

Kelimpah ari nya, Abang Johari ti mega Menteri Pengawa Berumah madahka dalam timpuh ke semak tu, Perintah Sarawak enggau Perintah Besai benung ba renggat berunding sereta merambu deka ngaga tiga buah jematan ke dikearapka ulih negapka agi penyambung jalai ba pesisir pantai di Sarawak.

“Enggau chara negapka agi jalai penyambung pesisir pantai deka nyendiaka peluang pengawa dagang sereta peluang pengawa, mantu orang berikan, betanam betupi nyengkaum industri dagang temuai,” ku iya lalu nandu, jematan Batang Sadong deka nyadi identiti menua Sadong.

Ba pengawa nya, Najib madahka palan alai JKR ngaga Jematan Batang Sadong nya nyimpan barang sida diatu udah puang, lalu gudang nya diatu udah ditetapka deka diberi ngagai komuniti ke diau dia ngambika dikena sida bejalaika pengawa ti bekaul.

Sama bisi datai kemari, Menteri Kereja Dato Sri Fadillah Yusuf, Menteri ba Opis Menteri Besai Dato Sri Nancy Shukri, Sekretari Perintah Sarawak, Tan Sri Datuk Amar Morshidi Ghani, menteri kabinet enggau tuaituai raban bansa.-BP