Rita Gaga Udah Megai Status Peranak Malaysia

KUCHING : Rika Herline Ji-In,17, asal ari Kampung Mongkos, Serian ngenatai pengaga ati pengudah mujur bulih Mykad kemari lalu nyadi pengujung status ukai peranak menua ti udah meri penanggul ngagai pengidup iya ngelamatu.

Lebuh dirandau pengudah ngambi Mykad ari Opis Pengerijista Bansa (JPN) Simpang Tiga kemari, iya ke kala besekula di SMK Tebakang ngasai Mykad nya nyadi pemeri Hari Krismas ti mai reti ke besai ti dikerami sida sebilik.

Iya ngarap ulih ngambi peresa Sijil Pelajaran Malaysia (SPM) udah tu lalu majakka pengawa ngulihka pelajar ke lebih tinggi agi ungkup diri sebilik,

Diatu, Rika udah bisi kad pengelala ke nyadi penerang iya seiku peranak Malaysia.

“Aku berasai chukup gaga diak diatu aku udah bisi Mykad. Udah tu aku deka ngambi peresa SPM, engka nyadi chalun ngatika diri tauka nampung pengawa besekula dulu.

“Udah nya aku engka deka nampung pelajar ngagai ikas ke tinggi agi tauka ngambi bengkah latih pengelandik,”ku iya.

Apai Rika, Ji-In Ngampu bela bekunsi pengaga enggau anak iya pengudah suah ngenataika pinta sereta nempuh mayuh bengkah proses.

Orang bekebun ke beumur 40 taun nya madah Rika anak tuai seduai bini iya (Indonesia) ke mega bansa Bidayuh ke alai seduai ditikah nengah Adat, 18 taun ke udah.

Ku iya nambah, anak lumur dua seduai ke beumur 14 taun udah bisi Mykad lalu ke biak beumur 9 taun bedau chukup umur ngenataika pinta Mykad.

“Rika seiku pelajar ke regas lalu udah menang mayuh midul ba lumba sekula.

“Iya kala dipilih ngarika Pelilih Samarahan ba lumba enggau main. Tang ketegal ti nadai penerang diri, peluang nya enda ulih diambi iya ke alai iya mega enda ulih minta program bantu ke bisi disedia.

“Diatu iya udah bisi Mykad lalu aku ngarap iya ulih nampung pelajar,”ku Ji-In.

Rika seiku ari tujuh nembiak ari menua pesisir Sarawak ti diberi Mykad nengah saup Gerempung Dayak Iban Sarawak(SADIA) enggau Sarawak 4 Sarawakians(S4S).

Sida ke bukai ke bekaul enggau kes ti bepelasarka Surat Tikah Adat (apai indai) iya nya Roziana Akui, Heliana Akui, Emirozy Rosli, Shera Senga, Isabella Kuin enggau Ica Kuin.-UB