Bah ba Telang Usan majak balat

MARUDI: Gaya bah di Telang Usan majak balat, pia ku Kaban Kunsil Nengeri (ADUN) Telang Usan, Dennis Ngau, pengudah bejalai ngabas sekeda kandang menua ke ampuh bah di sitak Telang Usan kemari.

“Pejalai kami sebuat mega bisi tejanggal ketegal jalai nuju ngagai tumpuk pendiau mega ampuh.

“Tim kami begulai enggau raban ari Opis Pengintu Pengelantang (JKM) Miri, Raban Nyaga Pengelikun Mensia Mayuh Malaysia (APM), raban polis enggau soldadu mai barang pemakai mujur datai ba tumpuk pendiau di Sungai Apoh, ke udah ampuh ngelui ari tiga hari.”

Ku Dennis, sekeda tumpuk pendiau baka Long Bedian, Apoh, Long Anyat di Patah sereta tumpuk pendiau ke tinggi mega ampuh.

Berebak enggau nya, Dennis ke bisi sambung enggau bilik operasyen ba Opis Pelilih Telang Usan di Long Lama sereta suah nerima penerang ke baru ari bala ketuai tumpuk pendiau ti ngansak piak bekuasa bekaul ngambika sedia napi sebarang penusah. Ujan bejurut ba serata Telang Usan dipelaba ngasuh bah lubah surut.

Naka ke diatu, nadai peranak rumah panjai ke ampuh diasuh mindah laban sida mindah ke sadau, kelimpah nembiak sekula di Sekula Primari (SK) Long Sobeng, Ulu Tinjar, udah dipindah piak sekula ngagai rumah panjai laban kesemua sekula udah ampuh datai ba perabung.

Bantu pemakai ke diberi perintah semina diungkup ngagai sida ke tepekul ba rumah panjai.

“Enti sema rumah kita ampuh tang ukai ba tumpuk pendiau, anang minta agih sida, laban kitai mantu peranak rumah panjai ke tepekul. Kitai nemu bantu enda chukup.

“Aku minta ampun pasal pekara tu, alai bantu datai ari perintah ti siruka bala rayat betapi enggau penusah baka ampuh bah.”

Iya nangkan sida ke bisi umai ke ampuh bah patut ngeripot ngagai tuai rumah sida ngambika iya ulih nganjung ripot ngagai Opis Pelilih Telang Usan.

Dennis meragam sekali tu enda mimit ari 10,000 iku ba serata Telang Usan dituntung penusah bah.

Lebuhka ditanya baka ni bulih penyampau nya, ku iya, anang semina ngira rumah ke ampuh aja, tang mega sida ke bejalai mindah napi pemar ketegal jalai ampuh, jematan runtuh baka di Long Kevuk, alai bala nembiak enggau pengajar ke enda ulih nurun ke sekula, sereta mayuh agi ke bukai.

“Dua buah jematan di Kampung Penan Long Kevuk ke diperatika aku begunaka belanja dikena ngemanah. Nya alai aku ngapil ngagai kepala menteri meri bantu ngagai peranak ke dipegai aku ba pekara tu.

Ba lansa ke bukai, ku Dennis, sekeda lis peranak ke udah nganjung ripot disempulang rumah panjai ke dituntung penusah iya nya Long Bedian, Long Ati, Long Tujang, Long Buang, Long Bemang, Long Loyang ,Long Batan, Long Aton, Long Sobeng, Long Anyat, Long Luteng, Long Puak enggau Long Lama.

“Aku pechaya, deka mayuh agi rumah panjai tang ketegal bisi penanggul ba arus penyambung alai tuai rumah bedau nganjung ripot sida.”-UB