Anang nempayaka peluang ti disediaka, ku Masing

KUCHING: Tujuh belas iku nembiak ke nerima skolarship ari Yayasan Pendidikan Teknikal Sarawak (Teras) dikerami begulai enggau Chairman Teras Tan Sri Dr James Masing ba sebengkah pengawa makai lemai nyerumba Pre-Gawai Kolej Sunway, Kuching malam ensanus.

Raban pelajar Dayak ke datai ari Bau, Kuching, Lawas, Sri Aman enggau Julau nya diatu benung ngambi kos ‘Diploma in Accounting’ (DIA) di Kolej Sunway, Kuching ke nyadi ‘partner’ Teras ngemujur juluk ngangkatka mayuh agi bansa Dayak nyadi akuantan.

“Yayasan Teras netap pemutus ngatur kerejasama enggau Kolej Sunway, Kuching ketegal kitai keran nyaup menua enggau nengeri nempa mayuh agi akauntan, lebih agi ari raban bansa Dayak.

“Kitai pechaya kerejasama tu ulih nyaup ngemujur juluk ti deka meda mayuh bansa Dayak nyadi akauntan ke alai Kolej Sunway Kuching ngembuan rikod manah nempa raban akuantan ti bekualiti ngelamatu,” ku iya.

Masing ke mega Menteri Kanan enggau Menteri Pemansang Tanah madah menua tu begunaka urung 60,000 iku akauntan manggai ba taun 2020 lalu diatu mengkang kurang setengah ari penyampau nya.

Ku iya, penyampau raban bumiputera ti ngambi profesyen akauntan mega mengkang kurang lalu udah nyadi isu ti patut diputar.

“Pansik ba taun 2008 mandangka semina 12.8 peratus orang bumiputera nyadi akauntan di Malaysia.

“Di Sarawak, penyampau nya jauh kurang ke alai naka bulan Oktober 2012, semina 2.58 peratus raban bumiputera nyadi akauntan di nenegri tu,”ku iya.

Pesan aku ngagai semua 17 iku pelajar ke nerima scholarship Teras: ‘Kena meh enggau manah awak ke diberi, belajar enggau bebendar ngambika kami tau berasai temegah”.

Teras ditumbuhka parti Dayak suba enggau tuju meri skolarship ngagai bansa Dayak nyentuk sida nembuka pelajar lalu semina diungkupka ngagai pelajar teknik aja.

Bela datai ngerami pengawa ke diatur di Sarawak Club ditu, Menteri Muda Tanggung Pengawa Raban Bansa Datuk Peter Nansian, Chairman Sarawak Dayak Graduate Association (SDGA) Dr Dusit Jaul enggau orang bukai.- utusan borneo