Elizabeth Deng keterubah indu Orang Ulu nyadi Temenggong di Sarawak

Pengawa nyirika Pemancha Elizabeth Deng Wan, orang indu ti keterubah nyadi Temenggong ari raban Orang Ulu di Sarawak ngayanka perintah nengeri tu chukup ngemeratka penau sereta pengelandik orang indu lebih agi raban bansa Orang Ulu di Baram.

Kaban Kunsil Nengeri Telang Usan, Dennis Ngau madah, Elizabeth Deng endang seiku indu ke patut nyadi ketuai laban murihka penau apai iya empu, niang Pemancha Deng Wan.

“Aku pechaya iya ulih bejalaika tanggungpengawa nyadi Temenggong ke udah diberi perintah nengeri ngagai iya laban ngelama tu iya endang chukup chakah nulung raban bansa ba menua Baram,” ku iya ditu kemari.

Dennis madah, pengawa nyiri Elizabeth Deng nyadi Temenggong endang balat ngasuh raban bansa ke nguan pelilih menua Baram berasai temegah lebih agi ba sida ke indu.

ya madah, ex-Ketuai Indu PBB N.67 Telang Usan nya endang seruran chakah bejalaika aktiviti ungkup mensia mayuh kelimpah ari dikelala sereta diaku mensia mayuh seiku orang ke landik nyadi ketuai.

“Pengawa nyirika Elizabeth nya mega nyadi sejarah baru ngagai orang indu bansa Orang Ulu laban perintah pechaya iya ulih bejalaika tanggungpengawa ke lebih besai pengudah mujur nyadi pemancha ngelama tu,” ku iya.

Tambah mega, ku Dennis, indu nya enda kala mut-mut lebuh bejalaika pengawa ke udah diberi perintah, iya tetap ngereja pengawa nya enggau ati ke chukup gaga.

“Iya enda kala berundingka upah pengudah ke dipadu nyadi pemancha ngelama tu lalu iya manah amat lebuh megai tanggungpengawa nya, nya alai perintah nengeri setuju milih iya nyadi Temenggong indu di menua Baram,” ku iya.

Elizabeth Deng endang peturun Maran (amin aya) tauka ari ruang bilik orang ke dipebasa ba raban bansa Kayan laban dulu suba apai iya, niang Deng Wan kala mangku pengawa nyadi pemancha ungkup bansa Kayan.

Pengawa nyiri Elizabeth Deng nyadi Temenggong dipenyadika Sapit Kepala Menteri, Datuk Patinggi Tan Sri Alfred Jabu Numpang.

Sama bisi datai ba pengawa tu Senator Lihan Jok, Residen Menua Miri Anthonio Kathi Galis, Pemesai ba Opis Kunsil Miri, Boniface Intang sereta bala pemesai opis perintah ke bukai.-BP