Regatta Sarawak nyadi penyungkak dagang temuai

KUCHING: Regatta Lumba Perau Naga Antarabansa deka nyadi atur pengawa tambah dalam Regatta Sarawak sereta dipasukka dalam kalender dagang temuai nengeri.

Kepala Menteri Tan Sri Datuk Amar Adenan Satem arap endar regatta lumba perau naga antarabansa nya ulih nyadi pematak temuai sereta nambahka penyampau temuai ari dalam enggau menua tasik datai ke Sarawak.

“Opis Menteri Dagang Temuai nengeri deka ngatur Lumba Perau Naga Antarabansa ninting taun nyerumba Regatta Sarawak ke deka dipasukka dalam kalender dagang temuai.

“Kami arapka udah tu ila mayuh agi orang datai enda ngira ari dalam enggau menua tasik ngulu pengerami tu (Lumba Perau Naga Antarabansa) nyerumba Regatta Sarawak,” ku iya.

Adenan bejaku munyi tu lebuh bejadika Regatta Sarawak 2014 enggau Regatta Perau Naga Antarabansa 2014 ti diatur ba Tebing Ai Kuching ditu, kemari.

Dalam taun 2014, bisi 11 buah menua udah nyereta Regatta Perau Naga Antarabansa baka Australia, Kanada, Hong Kong, Macau, Brunei, Singapura, Filipina, Thailand, Taiwan, Indonesia enggau Malaysia.

Ngenang pasal Regatta Sarawak, iya madahka pengerami Regatta nya ngelui ari 100 taun udah diatur ti ngembuan penyelai sereta sejarah kediri empu.

Regatta Sarawak ngembuan sejarah ti chukup panjai kenyau iya berengkah diatur dalam taun 1872 nyentukka sehari tu, ti ukai semina endur ngatur lumba perau tang mega nyendiaka palan pemandang, bejual sereta ngempuruka rayat Sarawak.

Ba jaku lalau dalam bup pengerami Regatta Sarawak 2014, Adenan madahka Regatta Sarawak sebengkah pengerami ti chukup tebilang di Sarawak enggau serata menua ke diatur ninting taun ba Tebing Ai Kuching.

“Rambai jaku Regatta Sarawak iya nya the Race for Harmony amat setipak endar enggau pemanah sereta penyerakup rayat Sarawak lebuh nerima temuai ari menua tasik.

“Pengerami asal baka lumba perau ke diatur nyerumba Regatta Sarawak tu dikena ngetanka adat enggau main asal ke ditampung rayat nyentukka seharitu.

“Dikearapka Regatta Sarawak tu deka terus nyadi pengerami ke tebilang ba atur pengawa ngelakuka Sarawak nyadi nengeri ti ngembuan mayuh adat enggau main asal, sereta ulih idup segulai sejalai dalam pemaik enggau pengelantang,” ku lalau iya dalam bup pengerami Regatta Sarawak 2014.

Sama bisi ngulu pengerami nya kemari, menteri ti megai tanggungpengawa nyadi Menteri Dagang Temuai Datuk Amar Abang Johari Tun Openg, Menteri Pemansang Rama Tan Sri William Mawan Ikon, Menteri Perengkaguna Mensia Mayuh Datuk Amar Awang Tengah Ali Hasan enggau bala bukai.-BP