Lebih 87 Peratus Projek ‘Walkabout’ PM,TPM Udah Tembu

KUCHING: Sepenyampau 322 bengkah projek tauka 87.74 peratus (%) ari 376 buah projek ‘Walkabout’ Menteri Besai (PM) enggau Sapit Menteri Besai (TPM) di Sarawak udah tembu dipejalaika.

Menteri ba Opis Menteri Besai Datuk Joseph Entulu Belaun madah, penyampau ke tembu nya (322 projek) ti dirikodka naka 29 Oktober 2014.

Iya madahka 45 ari 376 projek ti dipejalaika di baruh ‘Aku Janji’ nya, benung sereta bedau berengkah dipejalaika.

“Di Sarawak aja komiti kami benung matau semua 367 projek ‘Walkabout’ Menteri Besai enggau Sapit Menteri Besai enggau penyampau RM3.05 billion, ti disebut tauka dipadahka seduai iya maya bejalaika pengawa kitu sekalika sebedau, benung enggau pengudah pengawa bepilih diatur.

“Ari penyampau nya (367 projek ti beungkus RM3.05 billion), naka seharitu 29 Oktober bisi 322 projek (87.74 %) enggau belanja RM900.21 juta udah tembu dipejalaika, 34 projek (9.26 %) ti beungkus RM1.61 billion benung dipejalaika sereta 11 projek (3 %) ti beungkus RM537.35 juta bedau berengkah dipejalaika,” ku iya seraya madahka semua projek nya projek fizikal.

Entulu mansutka penerang nya dalam aum pengarang berita bekaul enggau status pejalai projek ‘Walkabout’ YAB Menteri Besai enggau Sapit Menteri Besai di Negeri Sarawak naka 29 Oktober tu, ti diatur ba Kunsil Negeri (DUN) ditu kemari.

Dulu ari nya Entulu baum enggau bala komiti pematau projek ti digulu pengari ari semua ejensi enggau opis di serata Sarawak ti bekaul enggau projek nya.

Bejaku baru iya madahka, ari 11 projek ti bedau berengkah dipejalaika nya, tiga dipadahka maya pengawa bepilih mit Balingian ti semina deka dipejalaika taun 2015.

Reti iya kitai tinggal lapan projek ti bedau dipejalaika, tang ari lapan projek nya sebengkah projek bekaul enggau semaya meri tiga ekar tanah ke sebuah ruang bilik ba palan pengentap pendiau baru di Asap, Belaga, ku iya.

“Tiga projek ti udah dipadahka tang bedau berengkah dipejalaika nya nyengkaum tiga projek di Mukah iya nya ngemanahka Padang Bilun Mukah ti beungkus RM133.30 juta, ngaga SMK Baru di Balingian (RM60 juta) enggau ngaga SK Kampung Tellian ti beungkus RM19 juta, lalu penyampau semua tiga projek tu RM212.30 juta,” ku iya.

Kelimpah ari nya, pengudah tembu baum enggau raban pengarang berita, Entulu bisi bejalaika pengawa ngabas projek ngaga baru Dewan Sungai Apong Baru ditu, kemari.

Nitihku Residen Bagi Menua Kuching Zamahari Saidi, projek nya projek khas Walkabout Sapit Menteri Besai 2013, ti kala datai ngagai Kampung Sungai Apong nya.

Projek nya ti beungkus RM446,500 ke dipatau Opis Pelilih Kuching, naka 29 Oktober udah manggai 91% tembu.

“Projek tu projek ti dipadahka Sapit Menteri Besai lebuh iya ti nemuai kitu (Ngagai Kampung Sungai Apong) taun 2013 suba. Projek tu deka tembu dalam bulan November taun tu,” ku Zamahari.