Palan Pengenduh Tasah Ngenyit Di Tutup

KUCHING: Palan Pengenduh Tasah Ngenyit di Balai Raya Skim Skrang, Engkilili, Sri Aman ditutup pagi kemari ke alai semua 45 iku peranak menua ke dituntung penusah tasah bah ari 15 buah ruang bilik ke dipindah ba palan nya udah mulaika diri ngagai rumah diri.

Kelimpah ari nya, ba Bagi Menua Betong, speaker Bilik Operasyen Penusah Tasah Bah Betong, Shirala Kay madah ngagai pengarang berita, pemayuh peranak menua ke dipindah ngagai palan pengenduh dipeda majak nambah ngalih hari kemari ke alai 93 iku sida tu dipindah ngagai palan pengenduh tasah ngenyit di Dewan Panglima Rentap ari 18 buah ruang bilik.

Pemayuh nya nambah ari 24 iku (16 buah ruang bilik) pagi kemari.

Ku iya, ba dua bengkah palan pengenduh bukai, pemayuh peranak ke agi ngenduh ba palan nya mengkang enda berubah iya nya 126 iku iya nya ba Dewan Perpaduan Debak sereta 75 iku ba Rumah Henry Lubok Banga, Ulu Krian.

Ba bagi menua Sarikei, seiku raban pengereja pengawa ba Bilik O[perasyen Tasah Bah pelilih menua Pakan, Mohd Raili Johari madah, nyentuk ngagai tengah hari kemari, bisi 63 iku peranak menua dia (20 ruang bilik) dipindah ngagai palan pengenduh ke bisi disediaka, 53 iku (16 ruang bilik) diripotka pagi kemari.

Ku iya, peranak menua ke dituntung penusah tasah bah tu datai ari Rumah Jabang, Rumah Jampong, Rumah Embas, Nanga Wak ke alai sida dipindah ngagai Dewan Masyarakat Pakan kenyau ari lemai kemari.

Naka ke diatu, penyampau peranak ke dipindah ngagai palan pengenduh tasah ngenyit di serata nengeri Sarawak bisi 357 iku enti dibandingka enggau 389 iku pagi kemari. — BP