Penanggul Ai Di Betong Deka Teputar Enda Lama Agi

KUCHING: Penanggul nadai ai ti ngenusahka peranak di Bagi menua Betong dipelaba deka teputar enda lama agi berindik ari pengepam ai ba Loji Meresi Ai Lubau udah dipasang, pia ku Menteri Perengka Guna Mensia Mayuh Datuk Amar Awang Tengah Ali Hasan.

Loji nya dipelaba berengkah beoperasyen malam tadi tauka dinihari (7 Februari), tang enda ulih beoperasyen nitihka kapasiti penuh laban semina seiti pengepam aja ti dikena diatu.

Nitihku injinir Opis Kereja Raya (JKR), Mihai Johai, pengepam nya dibai ari Kuching urung pukul 2 pagi kemari sereta udah dipasang dikena nyilih seiti ari empat pengepam ti rusak ketegal bah ke nyadi dia apin lama ke udah.

Ku iya, pengawa masang pengepam ai baru nya begunaka timpuh lebih ari empat jam ke alai ai diisi baru ngagai endur nimbun ai di loji nya ti mega begunaka timpuh ke lama sebedau disadung ngagai pengguna di kandang menua nya

Kemari, Awang Tengah ngabas loji nya laban ti deka nemu pengerusak sereta minta injinir JKR meresa sereta ngambika pekara nya diputarka jampat.

Iya madah, piak bekuasa benung bejalaika kereja ti pemadu manah dikena nentuka sebarang penanggul ti nyadi diputarka enggau jampat awakka meri pengelantang ke lebih agi ngagai peranak di Betong.

Ku Awang Tengah, chara pemadu manah deka dipejalaika dikena nentuka loji meresi ai nya enda rusak baru nyema penusah ampuh bah bisi nyadi baru di kandang menua nya jemah ila.

Diatu ku iya, 30 buah luri dikena JKR nganjung ai ngagai sida ti dituntung penanggul nadai ai.-BP