Sarawak Setuju Numbuhka Sekula Indonesia, Ku Najib

PUTRAJAYA: Menteri Besai Datuk Seri Najib Tun Razak madah, perintah nengeri Sarawak setuju numbuhka Sekula Indonesia dikena ngemuntangka bala anak pekereja Indonesia besekula ba nengeri tu.

Iya madah atur ke sebaka mega deka digaga ba Sabah lalu diatu bisi 50 buah Sekula Indonesia di negeri nya.

“Kami setuju pasal sekula ditumbuhka ungkup bala anak pekereja Indonesia. Perintah negeri Sarawak udah setuju ngemendarka peminta ke deka numbuhka sekula nya di Sarawak.

“Nya alai, baka ke udah disemayaka UNESCO, hak pelajar enggau hak universal enda tau dikeengai,” ku iya rambau aum pengarang berita begulai enggau Presiden Indonesia Joko Widodo beserimbai enggau penemu iya tiga hari ketiai Indonesia nya ke menua tu ke diatur ba Beguna Perdana Putra ditu kemari.

Sebedau nya, Najib enggau Presiden Indonesia nya ke suah agi dikangau nama Jokowi bisi baum kelimpah ngulu aum begulai enggau bala pengari ari dua menua Malaysia-Indonesia.

Udah nya maya aum pengarang berita, Jokowi nyadaka pengaga ati bekaul enggau penemu Malaysia ke setuju numbuhka Sekula Indonesia di Sarawak.

“Pekara tu deka dipejalaika lengkas dikena ngemuntang baka nembiak belajar,” ku iya.

Sekula Indonesia endang patut ditumbuh dikena meri peluang belajar ngagai bala anak pekereja Indonesia ke gawa ba menua luar, kelimpah dikena ngiri pemanah ulah enggau pemandai ngagai sida.

Pekara tu asil randau ex-Presiden Indonesia Susilo Bambang Yudhoyono enggau ex-Menteri Besai Malaysia Tun Abdullah Ahmad Badawi maya 11 Jan 2008.

Sekula Indonesia Kota Kinabalu entara sekula keterubah dibuka ba menua tu kena 1 Dis 2008 ke alai bala nembiak peranak Indonesia ti gawa di Sabah belajar. -Bernama