Jematan Batang Samarahan Ngemuntangka Pejalai 270,000 Iku Peranak Menua Nya -KM

KOTA SAMARAHAN: Pengudah lebih 14 taun nganti, Pelilih Samarahan deka disikap enggau Jematan Batang Samarahan ti deka mai pemaik ngagai urung 270,000 orang ke nguan menua nya nyerumba taun 2018 ila.

Ba pengerami nasih tanah Projek Jematan Batang Samarahan kemari, Kepala Menteri Datuk Patinggi Tan Sri Adenan Satem pechaya jematan nya ila ulih ngangkatka ekonomi rayat ke diau ngelingi nya.
“Perintah Nengeri Sarawak pechaya Jematan Batang Samarahan deka meri pangka ke besai ba pengerembai ekonomi enggau pengawa rama di Pelilih Samarahan”.

“Jematan deka mai pemaik ngagai 270,000 iku peranak ditu lalu deka nyambung Kota Samarahan enggau Asajaya ke alai timpuh pejalai nya ulih dikelimat pengelama 30 minit enti dibanding enggau servis feri ti tebal agi bepanggai enggau tikas ai Batang Samarahan”.

“Kelimpah ari nya, pengawa nganjung bekal pemakai enggau bekal bukai ke diguna industri mega deka muntang agi dikereja,”ku Adenan.

Teks Adenan dibacha Sapit Kepala Menteri, Datuk Patinggi Tan Sri Alfred Jabu ti datai ngarika iya ke alai pengerami nya bela digulu Menteri Kereja Raya Malaysia, Datuk Fadillah Yusuf.

Adenan ngarap kontrektor ke udah dipilih enggau ejensi ti megai tanggungpengawa matau projek, iya nya Opis Kereja Raya (JKR) ulih meri kerejasama manah ngambika projek nya ulih ditembu dalam timpuh 36 bulan.

Kelimpah ari nya, Adenan mega ngansak Perintah Besai ngemeratka projek pemansang ke udah dipinta Sarawak ungkup projek dalam RMK11, ngambika nengeri tu ulih nyapai bengkah infrastruktur enggau pemansang sebaka enggau nengeri bukai di Semenanjung Malaysia.

Dulu agi ari nya, Fadillah ba jaku pengelalu iya madah, tembu ila jematan nya deka ngemanahka atur penyambung jalai nebing tasik lalu nentuka Kota Samarahan-Asajaya-Sadong Jaya disambung.

Ku iya, jematan ke manjai 774 meter nya deka digaga nyadi jalai dua gembar, dua alur pejalai ti begunaka ungkus belanja RM93.88 juta.

“Projek ngaga Jematan Batang Samarahan tu ditetap dalam timpuh 3 taun lalu disadang tembu dalam bulan Januari 2018,”ku iya.

Jematan nya deka meraka sungai Batang Samarahan lalu deka nyambung Kampung Baru (sepiak Kota Samarahan) enggau Kampung Tambay di sepiak Asajaya.

Bela bisi datai, Menteri ba Opis Menteri Besai Nancy Shukery, Menteri Pemansang Infrastruktur enggau Penyambung Dato Sri Michael Manyin, Menteri Muda Pengawa Berumah ke mega Adun Asajaya Datuk Abdul Karim Hamzah enggau orang bukai.-BP