Rayat Menua Pesisir Patut Diberi Penemu Senentang GST

SARIKEI: Mensia mayuh ngassuh perintah terus meri penerang lebih silik dikena ngemudahka sida iya nemu senentang baka ni ngena sistem Chukai Barang enggau Servis (GST) . Ku iya, penerang ke baka nya beguna amat laban agi mayuh rayat bedau nemu konsep iya ke betul senentang sistem chukai baru nya, "Pengawa meri penerang ngagai kandang menua pesisir mega beguna amat. Aku pechaya agi bisi orang kampung bedau nemu senentang GST," ku Salleh Julaihi, 43, ari Kanowit .

Ku Salleh, penerang ke betul mega patut diberi ngaga mensia mayuh ngena cheramah tauka program pengguna.

"Enti nyema bisi peluang enggau peminta ari sebarang orang, teruska pengawa meri penerang dikena nentuka rayat nemu senentang GST. " Ba penemu aku, maya ke diatu pengawa meri penerang semina bandar aja enti dibandingka enggau menua pesisir," ku iya.

Abdullah Marsat, 45, ari Kapit madahka, ngena sisitem GST bisi pemanah laban ulih nyungkakka ekonomi menua enggau rayat.

" Pengawa ke patut diberi fokus nya rayat ke diau ba menua ulu. Ni pemayuh  penemu sida iya senentang GST? Pengawa meri penerang patut diteruskan ngambika semua rayat nemu," ku iya.

Abdullah mega ngasuh perintah ngena semua agensi perintah ke bisi besangkut paut meri penerang senentang sistem GST ngagai semua rayat. Kelimpah ari cheramah ku iya, promosyen  senentang GST mega patut diatur ngena mayuh bengkah chara nyengkaum pengawa mansik, nanya mensia mayuh enggau forum,

"Kitai mega ulih bekunsika peneleba menua ke udah ngena sistem chukai ke baka tu. " Penerang nya patut nyengkaum pemanah, chara chukai nya dikena,  barang enggau servis ke enda mayar chukai enggau iya ka bukai. " Chara ke baka tu beguna amat laban rayat patut nemu penerang ke chukup sebedau sida iya nerima siti sistem," ku iya.

Ba senentang pekara bukai, Opis Menteri Dagang Dalam Nengeri , Koperasif enggau Pengguna (KPDNKK) meransang mensia mayuh ngaga ripot bekaul enggau pengawa orang dagang ke nikika rega barang ketegal perintah udah berengkah ngena GST.

Penulong Pemesai Neritka Kuasa KPDNKK Sarikei, Mohd Tamizi madahka, ripot ke baka nya beguna amat dikena nentuka sida iya ulih bejalaika pengawa nyekat orang dagang ari ngena peluang kebaka nya. Ku iya, mensia mayuh patut ngena kuasa sereta nemu hak sida iya empu ke nyadi pengguna, " Anang enda ingat ngambi sereta nyimpan resit.

Enti orang ke ngempu premis enda meri resit, anang meli barang," ku iya. 

Pemesai Neritka Kuasa Kastam Diraja Malaysia Sarikei, Awangko Shahbuddin Pengiran Abu Bakar ngasuh mensia mayuh meri penerang sereta bekerejasama enggau sida ke berkuasa.

Ku iya, mensia mayuh patut nyadi mata enggau pending laban sida ke bekuasa enda ulih bejalaika pengawa neritka kuasa enti mensia mayuh enda terus bekerejasama."Kami sigi endang begunaka kerejasama ari mensia mayuh ngambika kami ulih ngaga pengawa ke patut," ku iya.-UtusanSarawak