PDRM Bisi 12,000 Iti Pengawa Puang Diatu

PADAWAN: Penyampau pengawa puang dalam Polis Diraja Malaysia (PDRM) di serata menua diatu manggai ba tikas 12,000, ku Ketuai Polis Menua, Jeneral Tan Sri Dato Sri Khalid Abu Bakar.

Bejaku ba seiti aum pengarang berita pengudah nutup ‘latih Asas Kadet Sarjan Skuad 1/2014’ di Palan Pematih Polis (PULAPOL) Kuching Jalai Puncak Borneo ditu kemari, iya madahka penyampau nya mungkur polis bepangkat konstabel, sarjan enggau inspektor.

“Ba taun 2015, PDRM deka ngambi 6,750 iku kadet polis lalu ba taun ti deka datai kitai mega deka ngambi penyampau ke sama.

“Pengawa ngambi kadet baru tu dikena ngisi penuduk polis bepangkat konstabel, sarjan enggau inspektor,” ku iya.

Ngenang sentang raban kadet ke dikerami sehari nya, Khalid madahka pengawa nya nyadi seiti agi sejarah dalam PDRM, ke alai kadet ke graduet nerima Degree (Hons) ba Sains Polis.

Ku iya, sigi udah nyadi juluk PDRM ti deka nempa raban polis ke ngembuan kualiti tinggi lalu pekara nya dijapai sehari tu.

“Sehari tu 641 iku kadet ari serata menua graduet lalu program tu dikemujur nengah kerejasama raban ari University of Derby, United Kingdom,” ku iya.

Program ke sama (sarjan) bisi mega dipejalaika di Sabah enggau Air Hitam lalu ungkup tikas Inspektor dipejalaika di Kuala Lumpur, ku iya.

Ba kaul ke sama, Khalid madah program tikas inspektor nerima timbal ke chukup manah ke alai sida bisi nerima 14,000 pinta masuk nyereta program nya.

Kelimpah ari nya, iya mega madah naka ke diatu 15.8 peratus raban PDRM diarika orang indu lalu ejensi nagit nambah penyampau nya manggai ngagai 30 peratus

Nyaut tanya pemberita sentang penyampau raban bansa Cina ti udah minta ngulu program kadet polis rambau program ke diatur ungkup bansa Cina dulu suba, Khalid madahka program nya nda nerima timbal ke manah.

“Program enda nerima timbal ke manah ari raban bansa Cina. Semina 700 iku aja ke minta lalu ari penyampau nya kitai ngambi 545 iku.

“Taja pia kitai deka ngatur program ke sama dudi ila,” ku iya.-UB