Manyin: Tebedu Deka Bisi Sebuah Kelinik Pengerai Beungkus RM30j

TEBEDU: Sebuah klinik pengerai level 4 diperambu deka ditumbuh di Tebedu, senipak enggau kandang menua nya diangkat nyadi pelilih mit sitak Tebedu.

Menteri Pemansang Infrastruktur enggau Penyambung Dato Sri Michael Manyin Jawong madah, perambu enggau keretas kereja peminta nya udah dikenataika ngagai Opis Menteri Pengerai Malaysia.

“Beberapa minggu ke udah aku begulai enggau Menteri Muda Pengerai Mensia Mayuh Datuk Dr. Jerip Susil sereta Direktor Opis Pengerai Nengeri Sarawak Datu Dr. Zulkifli Jantan udah nganjung keretas kereja peminta sebuah klinik pengerai digaga di Tebedu ngagai Menteri Pengerai Datuk Seri Dr. S. Subramaniam.

“Bepelasarka timbal ari Dr. Subramaniam nyema dikemendarka perintah, klinik pengerai nya patut digaga ba tanah pemesai empat ngagai lima ikar beungkus urung RM30 juta.

“Dalam perambu nya (nitihka klinik level 4) deka bisi doktor sereta kereban dikena x-ray sereta mayuh agi ke bukai ti patut,” ku iya.

Manyin ke mega Kaban Kunsil Nengeri (ADUN) Tebedu madahka pekara nya lebuh dirandau raban pengarang berita pengudah bejadika Kem ‘I Want Sihat, Komuniti Sihat Perkasa Negara (KOSPEN)’ enggau Panel Penasihat Klinik Kesihatan ba Dewan Masyarakat Kampung Temong Putah ditu, kemari.

“Nyema perambu tauka peminta tu dikemendarka perintah ila, dia semua peranak di pelilih mit sitak Tebedu enda ibuh agi ke Serian, ambika chunto nyema deka x-ray, pekara ti mudah ulih diperubatka ba klinik nya ila.

Nambahka nya Manyin madahka Tebedu mega patut disikap tauka disediaka Opis Pengerara Api (Bomba) enggau Penyah Penusah berindik ari penyauh Tebedu ke Serian iya nya urung sejam.

Iya madah, pemisi Bomba ditiumbuhka di Tebedu, ulih narit pengemeran industri ngemansangka pengawa ba pelilih mit nya ila.

“Kami mega deka minta Bomba disediaka di pelilih Tebedu, laban ditu ila kami mega deka bisi industri.

“Enti nadai bomba orang enggai numbuhka industri ba Tebedu laban nyema penusah angus nyadi, ari Serian ke Tebedu ambis nadai dalam pejalai sejam,” ku iya.

Kelimpah ari nya opis betanam betupi, stesyen betanam betupi sereta opis perintah ke bukai mega deka ditumbuhka di Tebedu senipak diangkatka ari sub-pelilih mit nyadi pelilih mit.

Sama bisi dalam pengerami nya kemari Pemesai Opis Pengerai Pelilih Mit Serian Dr. Sharifah Norashikin Wan Ahmad enggau ke bukai.-UB