Pemutus Sekalika Bisi Tauka Nadai Pengari Indu Baru Dilempai Ba MT Parti

KUCHING: Pemutus ngenetap sekalika bisi tauka nadai pengari indu baru maya pengawa bepilih nengeri (PRN) tu ila, bepanggai ba Kaunsil Tinggi (MT) parti nya ti betuaika chairman Barisan Nasional nengeri ke mega presiden Parti Pesaka Bumiputera Bersatu (PBB) sereta Kepala Menteri Datuk Patinggi Tan Sri Adenan Satem.

Ketuai Indu Barisan Nasional Nengeri Dato Sri Empiang Jabu madah, barang chalun indu ke deka dikemendar ngarika PBB bediri maya pengawa PRN tu ila bepanggai ba pemutus renggat tinggi parti nya.

“Kami nadai minta sapa indu ari parti tu ke patut bediri ba sitak PBB maya PRN tu ila tang ngelempaika pemutus nya ba ketuai Kaunsil Tinggi parti,” ku Empiang.

Iya madah munyi nya lebuh dirandau pengudah nyadi ketuai maya aum Kaunsil Tinggi Indu PBB Sarawak ke ditangkanka aum Indu Barisan Nasional (BN) Nengeri ba Indu Opis PBB, Jalai Bako ditu, ensana.

Aum ke diatur tiga bulan sekali nya mega bejuraika penyendia semua penyikap kena napi PRN ti deka datai tu.

“Pengawa kami indu ari PBB ‘turun padang’, betemu enggau rayat ba renggat baruh sereta beratika penanggul ti ditapi sida.

“Tiap iku kitai mensia bisi penanggul bebida baka nya mega sesebengkah sitak ngembuan pemar ti enda sebaka enggau ke bukai. Sekeda sitak nya penanggul sida iya enda mayuh dibanding enggau sitak bukai, nya alai, kami bisi pengari ngemataka sitak nya enti sema wakil rayat enda ulih ngelawa tekala nya, lalu dibantu ari Indu Opis PBB ditu,” ku iya.

Nangkan nya, urung pukul 2.00 ngalih hari, Aum pampang Indu Barisan Nasional (BN) mega bisi diatur ti betuaika Sapit Ketuai Indu PBB Datuk Fatimah Abdullah ke ngarika Empiang madah, taja pan maya PRN bedau ditetapka, tang pampang indu BN udah besedia lebih agi nengah macham aktiviti ti dipejalai ba sesebengkah sitak ti ngemeratka kerejasama semua komponen parti politik dalam BN sereta mega ejensi perintah bukai.

“Pekara ti dikemerat iya nya, kitai ke gawa ke parti kelimpah ari kaban kunsil nengeri (ADUN) tauka kaban parlimen (MP) patut besemak enggau rayat, ngedut seraya ngerapit kaul sereta meretika penanaggul tauka peneka sida.

“Kitai deka ngenukuka BN ukai semina ulih menang tang enggau gaya ti tau dikemegah lebih agi ba Kepala Menteri laban pemujur nya ngayanka sukung ari ti rinduka polisi ti dipejalaika perintah diatu,” ku Fatimah.

Bela bisi ngulu atur pengawa nya, semua wakil indu pampang parti komponen BN iya nya Sekretari Indu PBB ti mega nyadi MP Sadong Jaya Nancy Shukri, Sapit Ketuai Indu Parti Demoratik Progresif Sarawak (SPDP) Theresa Udan, Mandal Ketuai Indu Parti Rakyat Sarawak (PRS) Angelina Umis enggau Ketuai Indu Parti Sa’ati Rayat Sarawak (SUPP) Datin Jennifer Chee sereta kaban parti dalam gempung BN bukai.-UB