Polis Sarawak Dipinta Tumu Nyendiaka Diri Napi PRN

KUCHING: Pesuruhjaya Polis Sarawak Datuk Seri Muhammad Sabtu Osman udah minta polis kontinjen Sarawak tumu nyendiaka diri napi pengawa bepilih nengeri ti deka datai tu ila.

Ku iya, nya nyengkaum nyendiaka diri ba pekara logistik enggau belanja lalu pemesai sereta raban polis disikap enggau penemu pasal pengawa bepilih.

“Pemesai enggau raban polis enda tau enda disikap enggau penemu ari sukut undang- undang enggau chara mutarka penanggul ke ditapi maya pengawa bepilih nya dipejalaika,” ku iya lebuh bejaku ba pengawa begempuru ninting bulan Polis Diraja Malaysia (PDRM) Kontinjen Sarawak ba Indu Opis Polis Kontinjen Sarawak ditu kemari.

Penggal Kunsil Nengeri (DUN) Sarawak diatu ti ngembuan 71 iti kerusi deka abis nyerumba Jun taun baru.

Iya ngarapka nadai penusah nyadi sekumbang pengawa bepilih nengeri nya dipejalaika ila.

Dalam konteks tu, Muhammad Sabtu madahka kerejasama ari semua pemesai, raban enggau pemesai perintah endang beguna amat.

“Aram mih kitai gawa dalam siti tim ti ngembuan pengelurus ati sereta progresif ngambi ulih ngangkatka PDRM ngagai tikas ke nyulut agi, kelebih di menua Sarawak,” ku iya.

Berebak enggau nya, iya madahka indeks pengawa jai di menua Sarawak bisi kusut ngagai 915 kes tauka 13.45 peratus ari timpuh Januari nyentuk 19 Oktober tu tadi enti dibanding enggau timpuh ke sebaka taun siti nyin tadi.

Ku iya, pengawa jai ngemedis orang kusut ngagai 116 kes tauka 14.83 peratus pengawa jai bekaul reta tengkira mega kusut ngagai 799 iti kes tauka 13.27 peratus.

Iya ngarapka prestasi nya dipajak nyentuk ujung taun tu.— Bernama