Aziz melaba, PRN11 nyangka deka diatur tumu ari timpuh DUN diketu

KUCHING: Komiti Pengawa Bepilih (SPR) melaba, Pengawa Bepilih Besai Nengeri ti Ke-11 (PRN11) endur berebutka penuduk Dewan Undangan Nengeri (DUN) nyangka deka diatur tumu agi ari timpuh DUN diketu.

Chairman SPR Malaysia Tan Sri Dato Seri Abdul Aziz Mohd Yusof madah, nitihka sistem bepilih di menua tu, pengawa bepilih endang suah diatur tumu.

“Kemaya, kitai (SPR) enda nemu tang kitai ulih melabaka PRN11 deka diatur enda lama agi,” ku iya.

Abdul Aziz mansutka jaku tu ba sebengkah aum pengarang berita pengudah bejadika penerang atur pengawa bepilih ungkup Pemesai Pengurus PRN11 enggau Pemantu kena 16 nyentuk 17 November tu ba sebengkah hotel ditu, kemari.

Iya nambah, ketegal nya SPR enda tau enda nyikap diri diatu ke alai semua atur pengawa bepilih endang tanggungpengawa ejensi nya.

Ku iya, DUN Sarawak deka diketu enda laun ari 19 Jun 2016 iya nya lima taun pengudah aum keterubah tembu pengawa bepilih ke dulu suba.

“Enti Tuai Pemegai Menua (TYT) enda ngetuka DUN nitihka timpuh nya, chara automatik DUN deka diketu ketegal udah chukup timpuh lima taun.

“Pengudah timpuh nya, SPR bisi awak 30 hari endur ngatur pengawa bepilih iya nya enda laun ari 19 Ogos 2016.

“Tang nitihka sistem kitai, pengawa bepilih suah dipejalaika tumu lalu ketegal nya SPR enggai nyadi enda nyikap diri berengkah diatu,” ku iya.

Ngenang kaul ke sama, Abdul Aziz mega madah ripot atur numbuhka sitak baru pengawa bepilih (Sarawak) udah disua ngagai parlimen.

Ripot nya ku iya deka dibantai lalu dipejurai ba Dewan Rakyat kena 2 Disember 2015 iya nya ba hari kedua penudi aum parlimen serak tu.

“Enti udah dipejuraika di parlimen, pekara nya deka dikenatai ngagai Yang Dipertuan Agong ngambi tau digazet.

“Enti semua proses tu udah dikemujur, reti nya ari sukut undang-undang penuduk DUN deka nambah ari 71 nyadi 81,’ku iya seraya madah, timpuh sebulan diguna endur nentuka pengawa ngazet sitak baru dikemujur.

Ba pengawa nyendiaka sitak baru nya, 11 sitak pengawa bepilih baru udah ditumbuh iya nya Batu kitang, Stakan, Serembu, Triboh, Gedong, Kabong, Telian, Selirik, Murum, Samalaju enggau Long lama.

Kelimpah ari nya SPR mega nganti nama DUN Bengoh nyadi DUN Mambong, Belawai nyadi DUN Kuala Rajang ke alai Parlimen Mambong diganti nyadi Parlimen Puncak Borneo.

Ba PRN11 tu ila, Abdul Aziz madah 15,000 pengereja pengawa SPR deka nentuka proses nya dipejalai enggau manah lalu begunaka belanja RM180 juta.

Atur ke sebaka mega deka dipejalaika di Sri Aman (17-18 November), Sibu (18-19 November) enggau Miri (19-20 November).

Sepenyampau 82 iku Pemesai Pengurus PRN11 ke udah dipilih deka datai ngulu penerang iya nya 13 di Sri Aman, Kuching (27), Sibu (24) enggau Miri (18).-UB