Perintah BN semampai ngemeratka pemansang menua pesisir: Adenan

PAKAN: Pengawa ngaga jalai enggau renggat kedua ngemanahka Jalai Pakan, Ulu Julau, Ulu Kota, Pakan di Bagi Menua Sarikei ke beungkus RM130 juta, deka meri pengelantang ngagai lebih 3,000 iku peranak ba kandang menua nya.

Kepala Menteri Sarawak, Datuk Patinggi Tan Sri (Dr.) Adenan Haji Satem madah, pekara nya endang lama udah dianti peranak menua nya, ti auska pemansang kelebih agi bekaul enggau pemenyana infrastruktur.

“Renggat keterubah jalai tu mungkur pengawa ngaga belabuh ari Pasar Pakan nyentuk ke Rumah Buing ti sepenyauh 13 kilometer ke beungkus RM63.7 juta, udah tembu digaga dalam taun 2011.

“Dikena nampung pengawa nya,perintah udah ngepunka projek nya ba renggat kedua ti berengkah ari Rumah Buing nyentuk ke Klinik Nanga Kara ti sepenyauh 15 kilometer, ngena ungkus RM130 juta.

“Projek nya disadang tembu dalam timpuh 3 taun, ti mungkur pengawa melakin, ngaga jematan, ngemanah sistem parit enggau sekeda pekara bukai,” ku Adenan.

Iya bejaku munyi tu ba Pengerami Bejadi Projek Ngaga Jalai Pakan, Ulu Julau, Ulu Kota, Pakan (Renggat Kedua) di Bagi Menua Sarikei ke diatur ba Rumah George Chunggut, Nanga Nansang, Pakan, kemari.

Ku Adenan, projek nya deka meri pengelantang ngagai peranak ari 12 buah rumah panjai nyengkaum dua buah sekula ke besemak iya Sekolah Kebangsaan (SK) Sembawang enggau SK Nanga Dayu.

Ku iya, perintah enggau ketuai Barisan Nasional (BN) deka majak ngemeratka pemansang di menua pesisir.

Dikena nentuka pemujur juluk nya, kerajaan amat ngarapka sukung penuh ari renggat nembiak redak, ku Adenan.

“Diatu kami deka semua nemu pengudah lebih 50 taun Sarawak merdeka,pekara nya besai amat reti ba kitai. Nya alai kitai enggai agi digaga baka ‘Anak Iru’ sereta ditinggal ari tetiap agenda pemansang.

“Enti di Semanjung Malaysia bisi jalai besai ti manah, kitai di Sarawak pan deka jampat ngaga Jalai Besai Pan Borneo ti nadai tol.

“Taja pia ari sukut politik, kita dekaka menua Sarawak nyeliah diri dipasuk politik ari Semanjung Malaysia ti kelalu ekstrem sereta enda engkeman ba peranak menua Sarawak ke diuan pupu raban bansa ti angkunka pengelikun sereta ngemeratka penyerakup,” ku Adenan.

Ku Adenan baru, kenyau iya nyadi Kepala Menteri Sarawak dalam timpuh dua taun tu, bisi 45 bengkah agenda ti nanggul rayat di nengeri tu udah mujur diputarka sechara berenggat.

Nya ku iya, nyengkaum ngenurunka tarif lekterik, nginsil tol, ngemunas aktitivi enchuri kayu ti udah mujur nutup lebih 30 buah kilang kayu, nagang pengawa berimba kampung sechara besai endur numbuhka ladang komisial ke suah nempa isu berebut tanah enggau peranak menua sereta mayuh agi agenda bukai ke suah nuntung rayat di nengeri tu.

“Pengawa ngenegika diri begulai enggau peranak menua Sarawak, kelebih agi bekaul enggau pekara nuntut hak royalti minyak enggau gis ngambika ditiki Petronas ari 5 ngagai 20 peratus sigi dipajakka belama seagi bedau dikemendarka.

“Nya sigi hak kitai, nya alai kitai patut ngasai, ngempu iya,” ku Adenan.

Ba pengerami ke sama mega, Adenan lalu ngungkupka belanja tambah RM2 juta ngagai Kaban Kunsil Nengeri (ADUN) N41 Pakan, ke mega Menteri Pemansang Rama Sarawak, Tan Sri Willam Mawan Ikom, ngambika bisi dikena iya ngemansangka peranak enggau kandang menua nya.

Bela bisi ngulu pengerami nya Kaban Kunsil Nengeri Pakan ti mega Menteri Pemansang Rama Sarawak, Tan Sri Willam Mawan Ikom, Menteri Pemansang Infrastruktur enggau Penyambung, Dato Sri Micheal Manyin Jawong, Menteri Muda ba Opis Kepala Menteri (Promosyen Pelajar Teknikal) ke lalu nyadi Menteri Muda Rampa Menua Sarawak, Datu Len Talif Salleh enggau Residen Bagi Menua Sarikei, Dr. Anthony Valentine Laiseh sereta urung 3,000 iku bala temuai ke bukai.-UB