Operasyen Felcra patut dikemanahka agi enti deka mujur di Sarawak

KUCHING: Pengempu tanah ti bisi masuk ba pengawa betanam sawit ti dipejalaika Kaunsil Penyerakup enggau Pengintu Tanah Perintah Besai (Felcra)di Pasai Siong, Tamin berasai enda lantang ati laban ejensi nya enda ulih mantu peranak menua ngulih pengawa ti manah agi tauka kontrek,pia ku Menteri Pemansang Tanah,Tan Sri Datuk Amar Dr James Jemut Masing.

Ku iya,pengurang ke diatu patut dikemetul dikena nentuka pesereta enggau peranak menua bulih penguntung ari dagang nya.

“Enti pengurang tu enda diputar, operasyen Felcra di Sarawak enda ulih mujur, pesereta enda lantang ati !. Felcra sebuah organisasyen ti manah tang atur pengawa sida di Sarawak begunaka perati ti silik,” ku Masing madah ngagai The Borneo Post empai lama ke udah.

Iya ninga penanggul tu ba randau ke diatur begulai enggau pesereta Felcra di Pasai Siong, Tamin empai lama.

“Bala pesereta nya minta Felcra ngemansangka tanah sida ti ngembuan pemesai urung 5,000 hektar, ke alai 400 hektar benung diperesi,” ku iya.

Masing mega madahka baja ti dibeli mega ukai baka kualiti ti udah diujika sekedda bala ti bisi ngulu randau nya, ti mega ex- staf Felcra ke mayuh peneleba.

“Nya alai sida nemu utai ke nyadi,” ku iya.

Masing,ti mge Presiden PRS madahka bala pesereta enda lantang ati enggau raban pengatur pengawa Felcra.

“Majoriti pengereja pengawa nya ari Semenanjung (80 peratus ) ari pangku ti diatas nyentukka baruh. Kontrektor menua tu pan enda dikeibuh laban ti lebih ngemeratka kompeni ari Semenanjung,”ku iya.

Masing mega madahka ba atur belanja, Felcra mega balat masau duit laban mayuh diguna ba pengawa bejalai enggau perengka pengangkut (TNT).

“Pengujung iya kurang duit dibelanja ba batang pengawa tang mayuh agi ba utai ti enda menuku,” ku Masing.

Ku Masing, Felcra berengkah bejalaika operasyen di Sarawak dalam taun 1979, bepun enggau projek ba kandang Rascom. Diatu bisi 53,700 hektar ti mungkur with 9,718 iku pesereta bisi kaul ba 112 iti projek.

Ku iya, naka kediatu dividen ti dibayar nggai pesereta kenyau ari taun 1996 bisi RM220.4 milion.

Sama bisi ngulu randau nya, Kaban Kunsil Nengeri Tamin Datuk Joseph Mauh Ikeh.-UB